(પ્રતિનિધિ) નડિયાદ, તા.14
નડિયાદ શહેરમાં હીટ એન્ડ રનના બનાવમાં એક 22 વર્ષિય યુવકનું કરૂણ મોત નીપજ્યુ છે. બ્લેક કાચવાળી ફોરચ્યુનર લઈને જતા નબીરાએ ફૂલ સ્પીડમાં ટક્કર મારતા યુવકનું ઘટના સ્થળે જ મોત થયુ છે.
વડોદરામાં નબીરાઓએ 8 લોકોને અડફેટે લીધા અને આ ઘટનામાં એક મહિલાનું સ્થળ પર જ કરૂણ મોત નીપજ્યુ છે. આ ઘટનાની હજુ તો શાહી સુકાઈ નથી, ત્યાં આજે ધુળેટીના દિવસે નડિયાદ શહેરમાં હીટ એન્ડ રનની ઘટનામાં વધુ એક યુવકે જીવ ગુમાવ્યો છે. એક બ્લેક કાચવાળી ફોર્ચ્યુનર ગાડીમાં નબીરો યુવતી સાથે સવાર હતો અને તેણે આ બાઈક લઈને જઈ રહેલા યુવકને જોરદાર ટક્કર મારી હતી અને આ ઘટનામાં બાઈક ચાલક યુવકનું મોત થયુ છે,
મળતી માહિતી મુજબ નડિયાદ શહેરના માઈ માતા મંદિર રોડ પર રહેતા 22 વર્ષિય યોગેશ ઉર્ફે યુવરાજ રાજપૂત વીકેવી રોડ પર પોતાની બહેનના ઘરે ધૂળેટીની ઉજવણી માટે ગયો હતો. આ વખતે યુવરાજ પોતાના બનેવીનું બાઈક લઈ બહાર નીકળ્યો હતો. જે દરમિયાન સંતરામ લેબોરેટરી પાસે પહોંચ્યો હતો અને તે દરમિયાન એક પુરપાટ ઝડપે આવતી બ્લેક કાચવાળી ફોર્ચ્યુનર નંબર જી.જે. 27 ઈ.ડી 0056માં સવાર નબીરાએ આ યુવરાજના બાઈકને ટક્કર મારી હતી અને નાસી છૂટ્યો હતો. આ હીટ એન્ડ રનમાં યુવરાજ રોડ પર પટકાતા માથુ ફાટી ગયુ હતુ અને માથા અને કાનમાંથી લોહી નીકળી રહ્યુ હતુ. આ ઘટનાની જાણ બહેન-બનેવીને થઈ અને તેઓ સ્થળ પર પહોંચતા તેમના હોંશ ઉડી ગયા હતા. યુવરાજને સિવિલ હોસ્પિટલ લઈ જવાયો અને ત્યાં તેને મૃત જાહેર કરાયો હતો. આ મામલે નડિયાદ ટાઉન મથકે ઉપરોક્ત ફોર્ચ્યુનર કારના ચાલક સામે ફરીયાદ નોંધાઈ છે.
છ મહિના પહેલા થયા હતા યુવરાજના લગ્ન
22 વર્ષે યુવરાજ દિલીપભાઈ રાજપૂતના છ માસ પહેલા જ લગ્ન થયા હતા. આજે ધુળેટીના દિવસે તે પહેલા પોતાની નાની બહેનને માઈ માતાના મંદિર પાસે પોતાના ઘરેથી લઇ અને વીકેવી રોડ પર મોટી બહેનની સાસરીમાં પહોંચ્યો હતો ત્યાં નાની બહેનને ઉતાર્યા બાદ તે બાઈક લઈને બહાર પાછો નીકળ્યો હતો. જે દરમિયાન આ ઘટના બની છે.
