બારા પ્રા. શાળામાં પ્રિયંકા ડાંગીની સેવા યથાવત રાખવા આદેશ, કલેક્ટર, નાયબ કલેક્ટર, મામલતદારને નોટિસ જારી કરાઈ
લીમખેડા તાલુકાની બારા પ્રાથમિક શાળામાં મધ્યાહન ભોજન યોજનાના સંચાલક પદની નિમણૂકનો વિવાદ હાઈકોર્ટ સુધી પહોંચ્યો છે. આ શાળામાં સંચાલક જોરસિંગ નિનામાની નિવૃત્તિ બાદ ખાલી પડેલી જગ્યા માટે પાંચ મહિલા ઉમેદવારોએ અરજી કરી હતી. મામલતદારે મેરિટના આધારે પ્રિયંકાબેન સંતોષભાઈ ડાંગીની નિમણૂક કરી હતી. આ નિમણૂકથી નારાજ થઈને અન્ય ઉમેદવાર ભૂરીબેન પ્રવિણભાઈ નિનામાએ નાયબ કલેક્ટર સમક્ષ અપીલ કરી હતી. નાયબ કલેક્ટરે પ્રિયંકાબેનની નિમણૂકને યોગ્ય ઠેરવી હતી.
ત્યારબાદ ભૂરીબેને કલેક્ટર દાહોદ સમક્ષ અપીલ કરી હતી. કલેક્ટરે પ્રિયંકાબેનની નિમણૂક રદ કરતો આદેશ આપ્યો હતો. આથી પ્રિયંકાબેને 18 માર્ચ 2025ના રોજ ગુજરાત હાઈકોર્ટમાં સ્પેશિયલ સિવિલ એપ્લિકેશન દાખલ કરી હતી.
હાઈકોર્ટે રાજ્ય સરકાર, દાહોદ કલેક્ટર, નાયબ કલેક્ટર લીમખેડા, મામલતદાર લીમખેડા અને ભૂરીબેન નિનામાને નોટિસ પાઠવી 17 જૂન 2025 સુધીમાં જવાબ માંગ્યો છે. અરજદારના વકીલ માંકડ દ્વારા દાખલ કરાયેલી અરજીના પગલે કોર્ટે બીજો હુકમ ન થાય ત્યાં સુધી પ્રિયંકાબેનની સેવાની સ્થિતિ યથાવત રાખવાનો આદેશ કર્યો છે.
