સાંજે ખીચડી ખાધા બાદ બાળકોની તબિયત બગડતા શાળા સંચાલકોમાં દોડધામ, તાત્કાલિક 108 દ્વારા સારવાર અપાઈ
એક બાળકની હાલત ગંભીર, ઉલટી-ઝાડાની અસર; અન્ય 11 બાળકોની સ્થિતિ સ્થિર હોવાનું પ્રાથમિક રિપોર્ટમાં જણાવાયું
દાહોદ તા. 03
દાહોદ જિલ્લાના લીમખેડા તાલુકાની રેસીડેન્સી શાળામાં 12 બાળકોને ખોરાકી ઝેરની અસર થતા શાળા સંચાલકોમાં દોડધામ મચી ગઈ હતી. ઘટનાને પગલે શાળા સંચાલકોએ તમામ 12 બાળકોને તાબડતોડ 108 મારફતે લીમખેડા સીએસસી સેન્ટર ખાતે સારવાર અર્થે ખસેડ્યા હોવાનું પ્રાથમિક તબક્કે જાણવા મળ્યું છે.
દાહોદ જિલ્લાના લીમખેડામાં આવેલી મોર્ડન સ્કૂલમાં સાંજના સમયે બાળકોએ કઢી, ખીચડી, રોટલા અને ચણાનું શાક ખાધૂ હતી અને ત્યારબાદ 12 બાળકોને ખોરાકી ઝેરની અસર થતા તેઓની તબિયત લથડી હતી. આ અંગે શાળા સંચાલકોને જાણ થતા તેઓએ તાબડતોડ તમામ 12 અસરગ્રસ્ત બાળકોને સારવાર અર્થે ખસેડવા માટે ઈમરજન્સી 108 એમ્બ્યુલન્સ ને જાણ કરી હતી.
થોડીક જ વારમાં દેવગઢબારિયા અને લીમખેડાની એમ્બ્યુલન્સ મોડેલ સ્કૂલના કમ્પાઉન્ડમાં પહોંચી હતી. અને તમામ 12 બાળકોને સારવાર અર્થે લીમખેડા સીએસસી સેન્ટર ખાતે લઈ જવામાં આવ્યા હતા.જ્યાં હાલ તમામની સારવાર ચાલી રહી છે. પ્રાથમિક માહિતી અનુસાર 12 માંથી એક બાળકને ખોરાકની વધુ અસર છે. જેમાં તેને વોમિટિંગ અને ડાયરિયા જેવી અસર થઈ છે. જ્યારે બાકીના 11 ની હાલત હાલ સ્ટેબલ હોવાનું સામે આવી રહ્યું છે.
