ઝૂંપડા હટાવ્યા બાદ એક ટ્રક જેટલો માલ સામાન કબજે કર્યો
દબાણ ટીમ સાથે રકઝક થઈ, એક સમયે વાતાવરણ તંગ બન્યું
વડોદરા શહેરના લક્ષ્મીપુરા તળાવ પાસે ગેરકાયદેસર કાચા પાકા ઝૂંપડાઓનું દબાણ પાલિકાની દબાણ શાખાની ટીમ દ્વારા દૂર કરવામાં આવ્યું હતું .
વડોદરા શહેરના પશ્ચિમ વિસ્તારમાં લક્ષ્મીપુરા ગામના તળાવ પાસે ટીપી 10, 18 મીટરના રોડ રસ્તા પર આવેલા કાચા પાકા 25 થી 30 ઝુપડાના દબાણો દૂર કરવામાં આવ્યા હતા. જેમાં દબાણ દૂર કરવાની કામગીરીમાં વડોદરા મહાનગરપાલિકાના અધિકારીઓ ચુસ્ત પોલીસ બંદોબસ્ત સાથે દબાણો દૂર કરવા માટે પહોંચ્યા હતા. કાર્યવાહી દરમ્યાન દબાણ શાખાની ટીમે ઝૂંપડા હટાવ્યા બાદ એક ટ્રક જેટલો માલ સામાન કબજે કર્યો હતો.
ઉલ્લેખનીય છે કે શહેરમાં ચારે બાજુએ ઠેર ઠેર ઠેર દબાણોની ભરમાર લાગી છે. પાલિકાની દબાણ શાખા જે જગ્યાએથી દબાણો દૂર કરે કે થોડા જ સમયમાં તમામ દબાણો પાછા થઈ જાય છે. આમ પાલિકાની કોઈ ચોક્કસ નીતિ દબાણ બાબતે નહીં હોવાથી દબાણ શાખાની ટીમ વારંવાર દબાણો ખસેડયા કરે છે. દરમિયાન ગોરવા લક્ષ્મીપુરા રોડ પર આવેલા તળાવની આસપાસ 20 થી 25 જેટલા ઝૂંપડાના દબાણો છેલ્લા કેટલાય વખતથી હોવાથી રોડ રસ્તા પણ સાંકડા થઈ ગયા હતા. આ તમામ ઝુપડા પૈકીના કેટલાક ઝૂંપડામાં ઈલેક્ટ્રીક કનેક્શન પણ આવી ગયું હતું. દબાણ શાખાની ટીમે જીઈબી ટીમ સાથે મળીને વીજ કનેક્શન કાપી નંખાયા બાદ ગેરકાયદે તમામ ઝુંપડાના દબાણો પર જેસીબી મશીન ફેરવી દેવાયું હતું.
કેટલાક દબાણ કરનારા લોકોને દબાણ ટીમ સાથે રકઝક થઈ એક સમયે વાતાવરણ તંગ બન્યું હતું. ત્યારે લક્ષ્મીપુરા પોલીસ સ્ટેશન સ્ટાફની દરમ્યાનગીરીથી મામલો થાળે પડ્યો હતો. પાલિકાની ટીમ સાથે ઘર્ષણ થતાં લોક ટોળા એકત્ર થતાં તેને પણ પોલીસોએ હટાવ્યા હતા.
