સૌથી વધુ 250 કેસ રોડ અકસ્માતનાં, જ્યારે ફટાકડા ફોડવા જતાં 17 લોકો દાઝી ગયા.
વડોદરા : પ્રકાશના પર્વ દિવાળી અને નવા વર્ષના તહેવારો દરમિયાન વડોદરાની સર સયાજીરાવ જનરલ હોસ્પિટલનું તાત્કાલિક વિભાગ અકસ્માતોના કેસની વણઝારને કારણે ધમધમતું રહ્યું હતું. માત્ર એક અઠવાડિયાના સમયગાળામાં અકસ્માત અને ઇજાના 337 જેટલા ઈમરજન્સી કેસ નોંધાતા હોસ્પિટલ તંત્ર દોડતું થઈ ગયું હતું.
હોસ્પિટલના રેસિડેન્ટ મેડિકલ ઓફિસર આર.એમ.ઓ., ડો. હિતેન્દ્ર ચૌહાણે આ અંગેની માહિતી આપતા જણાવ્યું હતું કે, તહેવારોના દિવસોમાં અકસ્માતોની સંખ્યામાં મોટો ઉછાળો જોવા મળ્યો છે. તારીખ 18 થી 25 દરમિયાન હોસ્પિટલના ઇમરજન્સી વિભાગમાં કુલ 337 કેસ નોંધાયા હતા.
ડો. ચૌહાણે આપેલી વિગતો મુજબ, નોંધાયેલા કુલ 337 કેસમાંથી સૌથી વધુ કેસ 250 જેટલા રોડ એક્સીડેન્ટના હતા. આ આંકડો સૂચવે છે કે તહેવારોના ઉત્સાહમાં લોકોએ વાહન ચલાવવામાં બેદરકારી દાખવી, જેના પરિણામે મોટી સંખ્યામાં અકસ્માતો થયા હતા.
આ ઉપરાંત, દિવાળીના તહેવારમાં ફટાકડાને કારણે દાઝી જવાની ઘટનાઓના પણ 17 કેસ નોંધાયા હતા. ફટાકડા ફોડતી વખતે સલામતીના નિયમોની અવગણનાને કારણે ઘણા લોકો દાઝી જવાથી ઇજાગ્રસ્ત થયા હતા.
જોકે, હોસ્પિટલ માટે રાહતની વાત એ રહી કે આ 337 ઇમરજન્સી કેસમાંથી હાલમાં કોઈ પણ દર્દી સારવાર હેઠળ નથી. તમામ દર્દીઓને જરૂરી પ્રાથમિક અને તાત્કાલિક સારવાર આપ્યા બાદ રજા આપી દેવામાં આવી છે. એસ.એસ.જી. હોસ્પિટલના આર.એમ.ઓ. ડો. હિતેન્દ્ર ચૌહાણે જણાવ્યું હતું કે, તહેવારોના દિવસોમાં હોસ્પિટલ તંત્ર સજ્જ રહ્યું હતું અને તમામ ઇમરજન્સી કેસને તાત્કાલિક સારવાર પૂરી પાડવામાં આવી હતી.
