બહુચર્ચિત મનરેગા યોજનાના મહાકૌંભાંડમાં દાહોદ પોલીસની સૌથી મોટી કાર્યવાહી
દાહોદના મંત્રી બચુભાઈ ખાબડના પુત્ર બળવંત ખાબડની સમેત તત્કાલિન ટીડીઓ દર્શન પટેલની ધરપકડ કરવામાં આવતાં દાહોદ જિલ્લાના સત્તાધારી પક્ષમાં સન્નાટો
દાહોદ:
દાહોદ જિલ્લામાં મનરેગા યોજના મહા કૌંભાંડે દાહોદ જિલ્લાની સાથે સાથે સમગ્ર ગુજરાત રાજ્યમાં હાહાકાર મચાવી મુક્યો છે ત્યારે આ મહાકૌંભાંડમાં દાહોદના મંત્રીના બે પુત્રોની પણ સંડોવણી હોવાની છડેચોક ચર્ચાઓની વચ્ચે ગતરોજ દાહોદ પોલીસ દ્વારા મંત્રી બચુભાઈ ખાબડના પુત્ર બળવંત પટેલ તેમજ તત્કાલિન ટીડીઓ દર્શન પટેલની પોલીસે ધરપકડ કરતાં સમગ્ર દાહોદ જિલ્લાની સાથે સાથે ગુજરાતભરમાં સત્તાધારી પક્ષમાં ચકચાર સાથે ખળભળાટ મચી જવા પામ્યો છે. મંત્રી પુત્ર સહિત તત્કાલીન સમયના ટીડીઓને આજરોજ પોલીસે દાહોદની કોર્ટમાં રજૂ કર્યા હતા જેમાં પોલીસ દ્વારા 14 દિવસના રિમાન્ડની માંગણી કરી હતી ત્યારે કોર્ટ દ્વારા પાંચ દિવસના રિમાન્ડ મંજૂર કરવામાં આવ્યા છે.
દાહોદ જિલ્લાના ધાનપુર અને દેવગઢ બારીઆ તાલુકામાં મનરેગા યોજનામાં ૭૦ કરોડનું મહાકૌંભાંડ આચરવામાં આવ્યું હોવાનું ખુદ દાહોદ જિલ્લા ગ્રામ વિકાસ અધિકારી દ્વારા દાહોદ પોલીસ મથકે થોડા દિવસો પહેલા મનરેગા યોજનામાં કાર્યરત એજન્સીઓના માલિકો સામે નામજાેગ ફરિયાદ નોંધાવતાં દાહોદ જિલ્લાની સાથે સાથે સમગ્ર ગુજરાત રાજ્યામાં આ મહા કૌંભાંડને પગલે ચકચાર સાથે સ્તબ્ધતા વ્યાપી જવા પામી છે. આ ફરીયાદ અગાઉ વિપક્ષના નેતા અમીત ચાવડા દ્વારા વિધાનસભામાં પણ ધારદાર રજુઆતો કરવામાં આવી હતી અને આ મનરેગા મહાકૌંભાંડના પુરાવાઓની સાથે ગુજરાતના મુખ્ય મંત્રીને રજુઆત પણ કરવામાં આવી હતી. ત્યાર બાદ આ મનરેગા યોજના સંદર્ભમાં સરકાર દ્વારા ગંભીરતા દાખવી દાહોદમાં જિલ્લા ગ્રામ વિકાસ અધિકારી દ્વારા ફરિયાદમાં રૂપાંતર થતાં સૌ કોઈ સ્તબ્ધ થઈ ગયાં હતાં. મુખ્યત્વે આ મનરેગા મહાકૌંભાંડનું સમગ્ર નેટવર્ક દાહોદના મંત્રી બચુભાઈ ખાબડના પુત્ર કિરણ ખાબડ અને બળવંત ખાબડ સમગ્ર મનરેગા યોજનાનું ધાનપુર અને દેવગઢ બારીઆ તાલુકામાં કામકાજ સંભાળતા હોવાની ભારેખમ ચર્ચાઓ લોકમાનસમાં ઉદ્ભવવા પામી હતી પરંતુ પોલીસ ફરિયાદમાં આ બંન્ને મંત્રી પુત્રોના નામોનો સમાવેશ ન કરવામાં આવતાં તે ક્ષણે આશ્ચર્ય પણ સર્જાયું હતું. દાહોદ પોલીસે આ મહાકૌંભાંડમાં કેટલાક આરોપીઓની ધરપકડ પણ કરી છે. અને આરોપીઓ હાલ જેલવાસ પણ ભોગવી રહ્યાં છે અને થોડા દિવસો પહેલા દાહોદ પોલીસ દ્વારા ધરપકડ કરવામાં આવેલ આરોપી મનીષ પટેલ હાલ પોલીસ રિમાન્ડ હેઠળ છે. ત્યારે થોડા દિવસો પહેલા મંત્રીનો બંન્ને પુત્રો દ્વારા દાહોદની નામદાર કોર્ટમાં આગોતરા જામીન અરજી પણ મુકી હતી અને બાદમાં એકાએક આ આગોતરા જામીન બંન્ને પુત્રો દ્વારા પરત પણ ખેંચી લેવાતાં અનેક તર્ક વિતર્કો પણ વહેતાં થવા પામ્યાં હતાં. દાહોદ પોલીસ તંત્ર દ્વારા તપાસનો ધમધમાટ આરંભ કરતાં મંત્રી બચુભાઈ ખાબડના બે પુત્રો પૈકી એક પુત્ર બળવંત ખાબડનું નામ પોલીસ તપાસમાં સામે આવતાં ગતરોજ બળવંત પટેલની દાહોદ પોલીસે ધરપકડ કરી પોલીસ મથકે ચુસ્ત પોલીસ બંદોબસ્ત વચ્ચે લઈ આવી હતી. બળવંત પટેલ સમેત તત્કાલિન સમયના ટીડીઓ દર્શન પટેલની પણ પોલીસે ધરપકડ કરી છે. મંત્રી પુત્રની ધરપકડના સમાચાર વાયુવેગે દાહોદ જિલ્લામાં ફેલાતાં સૌ કોઈમાં સ્તબ્ધતા સાથે ચકચાર મચી જવા પામી હતી. તો બીજી તરફ દાહોદ જિલ્લાના સત્તાધારી પક્ષોમાં પણ અનેક ચર્ચાઓની વચ્ચે સન્નાટો પ્રસરી જવા પામ્યો છે. મંત્રી પુત્રની પોલીસે ઘરપકડ કરતાં આગામી દિવસોમાં હવે અન્ય મોટા માથાઓ તેમજ અધિકારીઓની પણ સંડોવણી બહાર આવવાની પણ પુરી પુરી શક્યતાઓ વ્યક્ત કરવામાં આવી રહી છે.
———————————————
