ચૂંટણીની તારીખ સપ્ટેમ્બરમાં જાહેર કરાશે
( પ્રતિનિધી )વડોદરા,તા.11
બરોડા ક્રિકેટ એસોસિએશનની એપેક્સ કાઉન્સિલની મહત્વની બેઠક યોજાઈ હતી. આ બેઠકમાં આગામી 88 મી વાર્ષિક સામાન્ય સભા અને સંસ્થાની ચૂંટણી અંગેના મુખ્ય મુદ્દાઓ પર ચર્ચા કરવામાં આવી હતી. પ્રેસિડેન્ટ અને સેક્રેટરી દ્વારા બીસીએની ચૂંટણી અને વાર્ષિક સાધારણ સભાની તારીખ અને સમય સપ્ટેમ્બર મહિનામાં જાહેર કરવામાં આવશે.
આગામી 88મી વાર્ષિક સામાન્ય સભાની તૈયારીમાં મુખ્ય બાબતો પર ચર્ચા કરવા માટે બરોડા ક્રિકેટ એસોસિએશનની એપેક્સ કાઉન્સિલની બેઠક મળી હતી. સચિવનો અહેવાલ અને એજીએમ માટે ખજાનચીનો અહેવાલ મંજૂર કરવામાં આવ્યો હતો. વર્ષ 2024-25 માટેના નાણાકીય નિવેદનો, ઓડિટરનો અહેવાલ અને 2025-26 માટે પ્રસ્તાવિત વાર્ષિક બજેટ, જે એજીએમના એજન્ડાનો ભાગ છે, તેને પણ કાઉન્સિલે મંજૂરી આપી હતી. લોકપાલ અને નૈતિકતા અધિકારીના અહેવાલમાં ક્લીન ચીટ આપવામાં આવી હતી. જેમાં વર્ષ દરમિયાન કોઈ ફરિયાદ નોંધાઈ ન હતી. 2025-26 માટે વૈધાનિક ઓડિટર્સ અને લોકપાલ અને નૈતિકતા અધિકારીની નિમણૂકની પુષ્ટિ કરવામાં આવી હતી. પ્રમુખ અને સચિવે બીસીએની ચૂંટણીઓ અને વાર્ષિક સામાન્ય સભાની તારીખ અને સમય નક્કી થયા પછી જાહેર કરવાની જાહેરાત કરી હતી.
