’કોન્ટ્રાક્ટરને કમાણી, પ્રજાને ખાડો!’
લોકાર્પણના ટૂંકા ગાળામાં જ એપ્રોચ રોડ ધસી પડતાં ગુણવત્તા પર સવાલ; સત્તાધીશો અને કોન્ટ્રાક્ટરની બેદરકારી ખૂલી
વડોદરા શહેરમાં ₹39 કરોડના ખર્ચે તૈયાર થયેલો બાજવા બ્રિજ તેના લોકાર્પણ ના માત્ર બે વર્ષની અંદર જ વિવાદના વમળમાં ફસાયો છે. બ્રિજ નો બાજવા ગામ તરફ જતો એપ્રોચ રોડ અચાનક બેસી ગયો છે, જેના કારણે રસ્તા પર એક મોટો અને જોખમી ખાડો પડી ગયો છે. આ ઘટનાએ બાંધકામની ગુણવત્તા અને સામગ્રી પર ગંભીર સવાલો ઊભા કર્યા છે, અને હજારો લોકોને જોડતા આ મહત્ત્વના બ્રિજ પરનો વાહનવ્યવહાર જોખમી બન્યો છે.
નવા બનેલા બ્રિજ નો ભાગ આટલા ટૂંકા ગાળામાં જ ધસી પડવાની ઘટનાએ સત્તાધીશો અને કોન્ટ્રાક્ટરની બેદરકારી ખુલ્લી પાડી છે. સ્થાનિક નાગરિકો અને નેતાઓએ આ પ્રોજેક્ટમાં ભારે ભ્રષ્ટાચારની આશંકા વ્યક્ત કરી છે. જો કરોડો રૂપિયાનો ખર્ચ કર્યા પછી બ્રિજ નો ભાગ બે વર્ષમાં જ બેસી જતો હોય, તો આ ચોક્કસપણે ટેન્ડર પ્રક્રિયા, સુપરવિઝન અને ક્વોલિટી કંટ્રોલ ની સિસ્ટમ પર ગંભીર પ્રશ્નો ઊભા કરે છે.
સ્થાનિકોના મતે, આ ઘટના જાહેર જનતાના પૈસાના દુરુપયોગ નું સ્પષ્ટ ઉદાહરણ છે. તેમણે ભારપૂર્વક માંગ કરી છે કે આ સમગ્ર મામલે ઉચ્ચ સ્તરીય તપાસ થવી જોઈએ અને જવાબદાર અધિકારીઓ તેમજ કોન્ટ્રાક્ટર સામે કડક કાયદાકીય કાર્યવાહી થવી જોઈએ.
આ ઘટનાથી માત્ર નાણાકીય નુકસાન જ નથી થયું, પરંતુ હજારો લોકોની સુરક્ષા પણ જોખમમાં મુકાઈ છે. વડોદરા મહાનગરપાલિકા અને રાજ્ય સરકારે આ મામલે તાત્કાલિક પગલાં લઈ, ક્ષતિગ્રસ્ત ભાગનું સમારકામ કરવું જોઈએ અને જવાબદારો સામે કાર્યવાહી કરવી જોઈએ. નાગરિકોની માંગ છે કે આ ઘટનાનું મૂળ સુધી જઈને તપાસ કરવામાં આવે, જેથી ભવિષ્યમાં જાહેર જનતાના પૈસા અને સુરક્ષાનું રક્ષણ થઈ શકે. આ બ્રિજનું તાત્કાલિક સમારકામ કરીને વાહનવ્યવહાર પૂર્વવત્ કરવો તે વહીવટી તંત્ર માટે તાતી જરૂરિયાત છે.
ભારે ટ્રાફિક કે નબળું બાંધકામ?
પ્રાથમિક દ્રષ્ટિએ, બ્રિજ ના એપ્રોચ રોડના પાયામાં નુકસાન થવાના બે મુખ્ય કારણોની સંભાવના વ્યક્ત થઈ રહી છે:
બાંધકામમાં હલકી ગુણવત્તાની સામગ્રીનો ઉપયોગ થયો હોય અને ગુણવત્તા નિયંત્રણમાં બેદરકારી રાખવામાં આવી હોય. બ્રિજ પરથી પસાર થતાં ભારે વાહનોના સતત ટ્રાફિક ને કારણે એપ્રોચ રોડના પાયાને નુકસાન થયું હોય, જેને લીધે રસ્તાનો ભાગ બેસી ગયો.
જોકે, સામાન્ય સંજોગોમાં નવો બ્રિજ ભારે ટ્રાફિક નો સામનો કરવા સક્ષમ હોવો જોઈએ. આટલા ટૂંકા ગાળામાં જ આ પ્રકારની ક્ષતિ થવી તે બાંધકામની મૂળભૂત નબળાઈ તરફ જ ઈશારો કરે છે.
