કામગીરી વખતે કેટલીક જગ્યાએ બોલાચાલીના દ્રશ્યો, સ્થાનિક પોલીસે મામલો સંભાળી શાંત પાડ્યો
વડોદરા: શહેરના વિવિધ વિસ્તારોમાં જાહેર તથા આંતરિક રોડ રસ્તે બિલાડીના ટોપની જેમ ઠેર-ઠેર લારી ગલ્લાના દબાણો થયા છે, ત્યારે વડોદરા મ્યુનિસિપલ કોર્પોરેશનની નવનિયુક્ત મ્યુનિસિપલ કમિશનરની તાજેતરમાં મળેલી બેઠકમાં ગેરકાયદે દબાણો હટાવવા અંગે થયેલી ચર્ચાના પગલે ગેરકાયદે દબાણો હટાવવાની ઝુંબેશ કરવામાં આવી છે. ત્યારે મંગળવારે પશ્ચિમ વિસ્તારમાં ફતેગંજ પોલીસ સ્ટેશનથી છાણી રામાકાકા ડેરી સુધી ઠેર-ઠેર ખાણીપીણી અને ચાની લારીઓ, શેરડીના કોલા અને કેરી રસના તંબુઓ, તથા ઓટો ગેરેજના ગલ્લાના દબાણો રોડ રસ્તાની બંને બાજુ હોવાના કારણે રસ્તા સાંકડા થઈ જવાથી અકસ્માતનો ભય સતત રહેતો હતો અને ક્યારેક નાના મોટા અકસ્માતો પણ થતા હતા. જેથી આ અંગેની ફરિયાદો મળતા પાલિકા તંત્રના આદેશ મુજબ દબાણ શાખાએ આ વિસ્તારના તમામ હંગામી દબાણો હટાવીને, કેટલાક કાચા શેડ તોડી નાખી રોડ રસ્તા ખુલ્લા કર્યા હતા. જોકે કામગીરી વખતે કેટલીક જગ્યાએ બોલાચાલી થતા સ્થાનિક પોલીસ કાફલાએ મામલો સંભાળી શાંત પાડ્યો હતો. દબાણ શાખાની ટીમે કાર્યવાહી દરમિયાન કુલ ચાર ટ્રક જેટલો માલ સામાન કબજે કર્યો હતો.
ત્યારે બીજી બાજુ માંજલપુર લાલબાગ બ્રિજ નીચેના દબાણો પણ દૂર કરાયા હતા. દબાણ શાખાની ટીમ અને વેપારીઓ વચ્ચે બોલાચાલી પણ થઈ હતી. લાલબાગ બ્રિજ નીચે નવા જૂના ફર્નિચર તેમજ ભંગારનો સામાન વેચતા અને ખરીદતા વેપારીઓ ગેરકાયદેસર રીતે પોતાનું સામાન મૂક્યો હતો. તે દબાણ હટાવવાની શરૂઆત કરતાં સ્થાનિક વેપારીઓ અને કોર્પોરેશનની ટીમ વચ્ચે ચકમક ઝરી હતી.
ગેરકાયદે દબાણો હટાવવાની ઝુંબેશ શરૂ કરવામાં આવી છે ત્યારે
ગેરકાયદે દબાણો હટાવવાની ઝુંબેશ ના ભાગ રૂપે પાલિકા દબાણ શાખા છેલ્લા કેટલાય સમયથી રોડ રસ્તા ના દબાણ દૂર કરી રહી છે અને રોડ રસ્તા ખુલ્લા કરવામાં આવી રહ્યા છે. રોડ રસ્તા પરના દબાણો દૂર કરવા નું મુખ્ય કારણ દબાણના કારણે અકસ્માતો નો ભય હોય અને ટ્રાફિક જામની સમસ્યા દૂર કરવા એક મહત્વનું પગલું ગણવામાં આવે છે .
