ટર્નઓવરના આંકડામાં છેડછાડ કરી ગ્લોબલ એન્ટરપ્રાઇઝે રૂ. 46 લાખનો કોન્ટ્રાક્ટ પચાવ્યો; હવે થશે બ્લેકલિસ્ટ
વડોદરા મહાનગરપાલિકાના ટુરિસ્ટ વિભાગ હસ્તકના અતિથિગૃહોમાં હાઉસકીપિંગનો કોન્ટ્રાક્ટ મેળવવા માટે નકલી દસ્તાવેજોનો સહારો લેનાર ગ્લોબલ એન્ટરપ્રાઇઝ સામે પાલિકાએ લાલ આંખ કરી છે. પાલિકા સાથે છેતરપિંડી આચરીને ઈજારો મેળવનાર આ એજન્સીને બ્લેકલિસ્ટ કરવા માટેની દરખાસ્ત સ્થાયી સમિતિ સમક્ષ રજૂ કરવામાં આવી છે.
વડોદરા મહાનગરપાલિકાના ટુરિસ્ટ વિભાગ દ્વારા શહેરના કુલ 19 અતિથિગૃહો અને કોમ્યુનિટી હોલનું સંચાલન કરવામાં આવે છે. આ પૈકી 9 અતિથિગૃહોમાં ઉચ્ચ કક્ષાની સફાઈ અને સુવિધા જળવાઈ રહે તે હેતુથી હાઉસકીપિંગની કામગીરી માટે વાર્ષિક ટેન્ડર બહાર પાડવામાં આવ્યું હતું. આ ટેન્ડર પ્રક્રિયામાં ત્રણ ઈજારદારોએ ભાગ લીધો હતો અને ત્રણેય ટેકનિકલ બિડમાં ક્વોલિફાઈ થયા હતા.
ટેન્ડર પ્રક્રિયા દરમિયાન રસપ્રદ વળાંક ત્યારે આવ્યો જ્યારે બે એજન્સીઓ, ગ્લોબલ એન્ટરપ્રાઇઝ અને માહી એન્ટરપ્રાઇઝ દ્વારા એકસમાન રૂપિયા 46,59,955 નો ભાવ રજૂ કરવામાં આવ્યો. પાલિકાના નિયમ મુજબ, જ્યારે ભાવ સરખા હોય ત્યારે છેલ્લા ત્રણ વર્ષનું જેનું વાર્ષિક ટર્નઓવર વધારે હોય તેને કામ સોંપવામાં આવે છે. ગ્લોબલ એન્ટરપ્રાઇઝ દ્વારા રજૂ કરાયેલા દસ્તાવેજોમાં તેમનું ટર્નઓવર અન્ય એજન્સી કરતા વધુ હોવાનું દર્શાવતા તેમને એક વર્ષ માટે હાઉસકીપિંગનો કોન્ટ્રાક્ટ સોંપવામાં આવ્યો હતો.
કોન્ટ્રાક્ટ સોંપાયા બાદ તપાસ દરમિયાન માલૂમ પડ્યું હતું કે ગ્લોબલ એન્ટરપ્રાઇઝે ટેન્ડર સાથે જોડેલા સ્વ-પ્રમાણિત દસ્તાવેજોમાં ગંભીર ગેરરીતિ આચરી હતી. સંસ્થાએ પોતાનું ટર્નઓવર અને નેટવર્થ વધારે બતાવવા માટે દસ્તાવેજોમાં આંકડાકીય ફેરફારો કરી ખોટા પુરાવા રજૂ કર્યા હોવાનું સપાટી પર આવ્યું હતું.
