દાહોદ તા.૦૫
અલીરાજપુર, ગરબાડા-દાહોદ નેશનલ હાઇવે પર દેવધા ગામ નજીક બે મોટરસાઇકલો વચ્ચે સામસામે અથડામણ થતાં ગંભીર અકસ્માત સર્જાયો હતો. આ દુર્ઘટનામાં બે યુવકોનાં ઘટનાસ્થળે જ મોત નીપજ્યાં હતાં. અન્ય બે યુવકો ગંભીર રીતે ઇજાગ્રસ્ત થયા હતા.
ઇજાગ્રસ્તોને તાત્કાલિક 108 એમ્બ્યુલન્સની મદદથી નજીકની હોસ્પિટલમાં સારવાર માટે ખસેડવામાં આવ્યા હતા. આ અકસ્માતમાં બંને મોટરસાઇકલો પર બે-બે યુવકો સવાર હતા. પ્રાથમિક માહિતી અનુસાર, વાહનચાલકોની બેદરકારી અને ગફલતને કારણે આ દુર્ઘટના સર્જાઈ હોવાનું મનાય છે.
ગરબાડા-દાહોદ નેશનલ હાઇવે પર અવારનવાર આવા અકસ્માતોની ઘટનાઓ બનતી રહે છે. આ હાઇવે પર વારંવાર થતી અકસ્માતની ઘટનાઓએ સ્થાનિક રહેવાસીઓ અને વાહનચાલકોમાં ચિંતા વધારી છે. ઘટનાની જાણ થતાં જ ગરબાડા પોલીસ ઘટનાસ્થળે પહોંચી ગઈ હતી. પોલીસે મૃતકોની ઓળખ કરવાની કાર્યવાહી શરૂ કરી છે. અકસ્માતના ચોક્કસ કારણો જાણવા તપાસ શરૂ કરી છે. આ ઘટનાએ ફરી એકવાર હાઇવે પર વાહનચાલકોની બેદરકારી અને ટ્રાફિક નિયમોના પાલનની જરૂરિયાતને ઉજાગર કરી છે. આ અકસ્માતની ઘટનાએ મૃતક યુવકોના પરિવારજનોમાં શોકનું મોજું ફેલાવ્યું છે. લોકો હાઇવે પર વધુ સુરક્ષા અને ટ્રાફિક નિયંત્રણની માગણી કરી રહ્યા છે.
