ફ્લાઇટ મોડી પડતા મુસાફરો હેરાન પરેશાન :
મુસાફરોને નવીનતમ ફ્લાઇટ અપડેટ્સ માટે તેમની સંબંધિત એરલાઇન્સનો સંપર્ક કરવાની સલાહ :
( પ્રતિનિધી )વડોદરા,તા.7
દેશના સૌથી વ્યસ્ત એરપોર્ટ ઇન્દિરા ગાંધી ઇન્ટરનેશનલ એરપોર્ટ પર હવાઈ મુસાફરી ધીમી પડી ગઈ છે. એર ટ્રાફિક કંટ્રોલ સિસ્ટમમાં ટેકનિકલ ખામી જોવા મળી છે. જેના કારણે 300થી વધુ ફ્લાઇટ્સ મોડી પડી છે. વડોદરા એરપોર્ટ પર પણ દિલ્હીથી આવનાર ઇન્ડિગો દિલ્હીનું આગમન 3.5 કલાક અને એર ઇન્ડિયા દિલ્હી 1.5 કલાક લેટ હોવાનું એરપોર્ટ ઓથીરિટી દ્વારા જણાવવામાં આવ્યું છે.
દિલ્હી એરપોર્ટ પર ઓટોમેટિક મેસેજ સ્વિચિંગ સિસ્ટમમાં સમસ્યા ઊભી થઈ છે. આ સિસ્ટમ મહત્વપૂર્ણ છે કારણ કે તે એર ટ્રાફિક કંટ્રોલર્સ દ્વારા ઉપયોગમાં લેવાતી ઓટો ટ્રેક સિસ્ટમને ઓટોમેટિક ફ્લાઇટ પ્લાન સહિતની માહિતી પૂરી પાડે છે. ટેકનિકલ ખામીને કારણે, નિયંત્રકોને મેન્યુઅલી ફ્લાઇટ પ્લાન તૈયાર કરવા પડી રહ્યા છે. જે સમય માંગી લે તેવી પ્રક્રિયા છે. જેના કારણે હવાઈ ટ્રાફિકમાં નોંધપાત્ર વધારો થયો છે અને વિલંબમાં વધારો થયો છે. દિલ્હી એરપોર્ટ પર ફ્લાઇટ્સ મોડી પડી રહી છે. દિલ્હી રનવે પર પાર્કિંગની જગ્યાના અભાવે એરલાઇન્સ સાંજની કેટલીક ફ્લાઇટ્સ રદ કરી શકે છે. એરપોર્ટ્સ ઓથોરિટી ઓફ ઈન્ડિયાએ આ સમસ્યાની પુષ્ટિ કરી છે. હવાઈ ટ્રાફિક નિયંત્રણ ડેટાને સપોર્ટ કરતી ઓટોમેટિક મેસેજ સ્વિચિંગ સિસ્ટમમાં ટેકનિકલ સમસ્યાને કારણે દિલ્હી એરપોર્ટ પર ફ્લાઇટ કામગીરીમાં વિલંબ થઈ રહ્યો છે, ઓથોરિટીએ સોશિયલ મીડિયા પોસ્ટમાં જણાવ્યું હતું. એર ઈન્ડિયા, સ્પાઇસજેટ સહિત અનેક એરલાઇન્સની ફ્લાઇટ્સ પ્રભાવિત થઈ છે, જેના કારણે મુસાફરોને અસુવિધા થઈ રહી છે. બીજી તરફ મુસાફરોમાં પણ મુંઝવણ છે. એટીસી સિસ્ટમમાં ટેકનિકલ સમસ્યાને કારણે આઈજીઆઈએ ખાતે ફ્લાઇટ કામગીરીમાં વિલંબ થઈ રહ્યો છે. શક્ય તેટલી ઝડપથી સમસ્યાનો ઉકેલ લાવી શકાય તે માટે એરપોર્ટ ટીમ ડાયલ સહિત તમામ હિસ્સેદારો સાથે સક્રિય રીતે કામ કરી રહી છે. મુસાફરોને થયેલી અસુવિધા બદલ એરપોર્ટ મેનેજમેન્ટ ખૂબ જ દિલગીર છે. મુસાફરોને નવીનતમ ફ્લાઇટ અપડેટ્સ માટે તેમની સંબંધિત એરલાઇન્સનો સંપર્ક કરવાની સલાહ આપવામાં આવી છે. વડોદરા એરપોર્ટ ઓથોરિટી દ્વારા આજની મોડી ફ્લાઇટ્સ અંગે માહિતી આપતા જણાવાયું છે કે, ઇન્ડિગો દિલ્હીનું આગમન 3.5 કલાક અને એર ઇન્ડિયા દિલ્હી 1.5 કલાક મોડી પડી છે. હાલ ટેક્નિકલ ખામીને કારણે મુસાફરો મુશ્કેલીમાં મૂકાયા હતા.
