કેબીનમાંથી ચાલકને બહાર કાઢવાં પોલીસે ફાયર વિભાગ અને ક્રેનની મદદ લેવી પડી
દાહોદ તા.૨૨
દાહોદ શહેર નજીક નજીક હોન્ડા શો રૂમની સામે બે ટ્રકો વચ્ચે સર્જાયેલા ગમખ્વાર માર્ગ અકસ્માતમાં એકનું ઘટના સ્થળ પર કમકમાટી ભર્યુ મોત નીપજતાં વિસ્તારમાં આ માર્ગ અકસ્માતને પગલે ચકચાર મચી જવા પામી હતી. ઘટનાને પગલે સ્થળ પર લોકટોળા ઉમટી પડ્યાં હતાં. ત્યારે ઘટનાની જાણ થતાં સ્થાનિક પોલીસના કાફલાએ સ્થળ પર દોડી જઈ તપાસનો ધમધમાટ આરંભ કર્યાનું જાણવા મળે છે.
દાહોદ નજીક અમદાવાદ ઇન્દોર હાઇવે હોન્ડા શો રૂમની સામે યુ ટર્ન પર ગમખ્વાર અકસ્માતની ઘટના બનવા પામી છે. જેમાં અમદાવાદ તરફથી પૂરઝડપે અને ગફલતભરી રીતે પોતાના કબ્જાની ટ્રક દોડાવી લાવી રોંગ સાઈટથી ધીમી ગતિ આવતી અન્ય એક ટ્રકને જાેશભેરે ટક્કર મારતા તે ટક્કરના કારણે આઈસર ટ્રકનું કેબીન કચડાઇ ગયું હતું. આઈસર ટ્રકમાં ચાલક તેમજ કંડકટર બન્ને ફસાયા હતા. અકસ્માત થતા આસપાસના દોડી આવેલા લોકોએ પોલિસને જાણ કરતા પોલીસ પણ ઘટના સ્થળે દોડી આવી હતી. પોલીસે જેમ તેમ કરીને આઈસર ગાડીના કેબીનમાં ફસાયેલા કન્ડક્ટર અને ટ્રક ચાલકને બહાર કાઢવાના પ્રયાસો હાથ ધર્યા હતા. જેમાં કંડકટરને કેબીનમાંથી બહાર કાઢી તાતકાલિક ૧૦૮ મારફતે સારવાર માટે ઝાયડસ હોસ્પિટલ ખસેડવામાં આવ્યો હતો. જ્યારે આઈસર ગાડીના ચાલક કેબિનમાં ફસાઈ જતા તેનું કમકમાટી ભર્યું મોત નીપજ્યું હતું. કેબીનમાંથી ચાલકને બહાર કાઢવાં પોલીસે ફાયર વિભાગ અને ક્રેનની મદદ લેવી પડી હતી. જેમાં ફાયર વિભાગ અને ક્રેનની મદદથી કેબિનમાં ફસાયેલા ચાલકને ભારે જહેમત બાદ કેબીનમાંથી બહાર કાઢી આઈસર ગાડીના ચાલકના મૃતદેહને નજીકના દવાખાને પીએમ માટે રવાના કરી પોલીસે આ સંબંધે ગુનો નોંધી આગળની કાયદેસરની કાર્યવાહી હાથ ધરી છે.
——————————————
