ડભોઇ જી.આઇ.ડી.સી.ખાતે પતરાની ઓરડીમાં રહેતા શ્રમજીવી દંપતી વચ્ચે અગમ્ય કારણોસર ઝગડો થયો હતો. સામસામે બોલાચાલી બાદ ઝગડો ઉગ્ર બનતા આવેશમાં આવી પતિએ પત્નીને લાકડાના ડંડા ના ફટકા મારી મોત ને ઘાટ ઉતારી દીધી હતી. જેથી કુટુંબી ભાઈની ફરીયાદના આધારે પોલીસે હત્યાનો ગુન્હો નોંધી આરોપી ને ઝડપી પાડી કસ્ટડી ભેગો કર્યો છે.
ડભોઇ પોલીસ સ્ટેશનમાંથી મળતી માહિતી મુજબ ફરીયાદી નામે અજયભાઈ શંકરભાઈ માલ ઉ.વ.18 હાલ રહે.જી.આઇ. ડી.સી.ડભોઇ.મૂળ રહે. ગવાડુંગળી, તા – ફતેપુરા, જી.દાહોદની ફરીયાદ માં જણાવ્યા મુજબ તે પોતાની કુટુંબી બહેન નામે પ્રેમિલાબેન દિનેશભાઈ વળવાઈ ઉ . વ.38 રહે.ગવા ડુંગળી,જી.દાહોદ તેમજ તેનો પતિ નામે શૈલેષભાઈ રમેશભાઈ કટારા ઉ . વ.38 રહે.આફવા,દાહોદની સાથે ડભોઇ જી.આઇ.ડી.સી.માં પતરાની ઓરડીમાં રહી મજૂરી ગુજરાન ચલાવી રહ્યા છે.ત્યારે ગતરોજ રાત્રીના તેની પિતરાઈ બહેન પ્રેમિલા અને તેના પતિ શૈલેષભાઈ કટારા વચ્ચે ઝગડો થયો હતો. જેમાં શૈલેષ કટારાએ પ્રેમિલા ને કહ્યું હતું કે તું મને પૂછ્યા વગર અને કહ્યા વગર વાપી ખાતે મજૂરી કરવા કેમ ગઈ હતી .જે વાત ને લઇ ઝગડો ઉગ્ર બનતા શૈલેષ કટારાએ પત્ની પ્રેમીલાને ડંડા વડે બેફામ માર મારતાં માથામા અને શરીરે ગંભીર ઈજાઓ થતાં તેનું મોત નિપજ્યું હતું. જેથી પિતરાઈ ભાઈની ફરીયાદ આધારે ડભોઇ પોલીસે હત્યા નો ગુન્હો નોંધી હત્યારા પતિ ને ઝડપી પાડી આગળની તપાસ હાથ ધરી છે.
