ઝાલોદ પોલીસે નકલી ચાંદીના દાગીનાની છેતરપિંડી કરનાર ગેંગ ઝડપી

Share

Tweet

Share

Share

Email

Comments

🔹 નકલી કડલા-ભોરીયા આપી રૂ. 39 હજારની છેતરપિંડી, 3 આરોપી ઝડપાયા
🔹 CCTV આધારે ઝડપી કાર્યવાહી, નકલી દાગીના અને મોબાઇલ ફોન જપ્ત

ગુજરાત મિત્ર ન્યુઝ, ઝાલોદ
ઝાલોદ પોલીસને નકલી ચાંદીના દાગીના આપી લોકો સાથે છેતરપિંડી કરનાર ગેંગ સામે મોટી સફળતા મળી છે. દાહોદ જિલ્લાના ઝાલોદ પોલીસ સ્ટેશન વિસ્તારમાં થયેલી બે અલગ અલગ છેતરપિંડીના ગુનાઓમાં પોલીસે કુલ ત્રણ આરોપીઓને ઝડપી પાડ્યા છે.
પોલીસ મહાનિરીક્ષક આર.વી. અસારી (પંચમહાલ-ગોધરા રેન્જ) તથા દાહોદ જિલ્લા પોલીસ અધિક્ષકના માર્ગદર્શન હેઠળ અને નાયબ પોલીસ અધિક્ષક ડી.આર. પટેલની દેખરેખમાં ઝાલોદ પોલીસે કાર્યવાહી હાથ ધરી હતી.

પ્રથમ ઘટના:
તા. 24/11/2025ના રોજ ઝાલોદ ખાતે એક કરિયાણાની દુકાન પર આરોપીઓએ પૈસાની તંગી હોવાનું કહી ફરીયાદી પાસેથી રૂ. 39,000 લઈ નકલી ચાંદીના કડલા આપ્યા હતા. આ અંગે ઝાલોદ પોલીસ સ્ટેશનમાં ગુ.ર.નં. 11821030251797/2025 મુજબ ભારતીય ન્યાય સંહિતા 2023ની કલમ 318(2), 318(4) તથા 3(5) હેઠળ ગુનો નોંધાયો હતો. CCTV ફૂટેજના આધારે તપાસ કરી નકલી ભોરીયા તથા બે મોબાઇલ ફોન જપ્ત કરવામાં આવ્યા.
બીજી ઘટના:
તા. 22/12/2025ના રોજ એક મહિલાને તેના પૌત્રના ઓપરેશનના બહાને રૂપિયા લઈ નકલી ચાંદીના દાગીના આપી છેતરપિંડી કરવામાં આવી. ઝાલોદ પોલીસે ગણતરીના કલાકોમાં બસ સ્ટેશન વિસ્તારમાંથી આરોપીઓને ઝડપી પાડ્યા અને નકલી ભોરીયા (13) તથા સાકળી (02) કબજે કરી.
પકડાયેલા આરોપીઓ:
શાતુભાઈ મતલાભાઈ ગરાસિયા – રહે. ધાવડિયા, તા. ઝાલોદ
રાજેશભાઈ કચરાભાઈ – રહે. મોયાવાસા, તા. ગડી
વિશાલ સોહનભાઈ – રહે. બડોદિયા, તા. બાગીડોરા
તપાસમાં બહાર આવ્યું છે કે આરોપીઓ દાહોદ, ઝાલોદ તથા બાંસવાડા (રાજસ્થાન) વિસ્તારમાં ફરીને નકલી ચાંદીના દાગીના આપી લોકો સાથે છેતરપિંડી કરતા હતા. ઝાલોદ પોલીસે અન્ય અજાણ્યા ગુનાઓની પણ તપાસ આગળ ધપાવી કાયદેસરની કાર્યવાહી હાથ ધરી છે.

રિપોર્ટર: દક્ષેશ ચૌહાણ, ઝાલોદ