પ્રતિનિધિ | બોડેલી
રાષ્ટ્રીય શિક્ષણ નીતિ–2020 અંતર્ગત જિલ્લા કક્ષાના એજ્યુકેશનલ ઇનોવેશન ફેસ્ટિવલનું આયોજન સંખેડા તાલુકાના બહાદરપુર ખાતે કરવામાં આવ્યું હતું. આ કાર્યક્રમમાં જિલ્લા પંચાયત પ્રમુખ મલકાબેન પટેલ, જિલ્લા શિક્ષણ સમિતિના ચેરમેન સંજયભાઈ રાઠવા, જિલ્લા શિક્ષણાધિકારી આનંદભાઈ પરમાર, જિલ્લા પ્રાથમિક શિક્ષણાધિકારી જે.કે. પરમાર તેમજ ડાયટના પ્રાચાર્ય બી.એમ. સોલંકી સહિતના મહાનુભાવો ઉપસ્થિત રહ્યા હતા.
વર્ષ 2025-26 દરમ્યાન બોડેલી તાલુકાના પાંધરા ગ્રુપની ગડોથ પ્રાથમિક શાળાના શિક્ષકો રાઠવા ઉદયસિંહ રતનસિંહ અને સોલંકી રાજેશભાઈ સુલતાનસિંહએ પોતાની શાળામાં અમલમાં મૂકેલા નવતર શૈક્ષણિક પ્રયોગો જિલ્લા કક્ષાએ રજૂ કર્યા હતા. જેમાં “મારી શાળાનો ખજાનો – શૈક્ષણિક પ્રાર્થના સંમેલન” તથા “હાજરી ચેમ્પિયન” જેવા અનોખા અને અસરકારક ઇનોવેશનનો સમાવેશ થાય છે.
આ બંને નવતર પ્રયોગોને જિલ્લામાંથી ઉપસ્થિત રહેલા લગભગ 800 શિક્ષકોએ નિહાળ્યા હતા અને તેને પોતાની શાળામાં અમલમાં મૂકવાની પ્રેરણા મેળવી હતી. આ નોંધપાત્ર કામગીરી બદલ બંને શિક્ષકોને જિલ્લા કક્ષાએથી શીલ્ડ, પ્રમાણપત્ર, ડાયરી તેમજ શાબ્દિક સન્માન આપવામાં આવ્યું હતું.
આ સન્માનથી બોડેલી તાલુકા, પાંધરા ગ્રુપ અને ગડોથ પ્રાથમિક શાળાનું નામ ગૌરવભેર રોશન થયું છે, તેવી લાગણી શિક્ષકવર્ગ અને ગ્રામજનો દ્વારા વ્યક્ત કરવામાં આવી હતી.
રિપોર્ટર: સૈયદ ઝહીર
