મહાપાલિકાની સ્થાયી સમિતિ સમક્ષ પાંચ કામોની દરખાસ્ત રજૂ કરાઇ
વડોદરા મહાનગરપાલિકા દ્વારા વિશ્વામિત્રી કિનારે સુરક્ષા માટે વધુ એક પગલું
શહેરમાં ગત વર્ષના પુરના ભયંકર અનુભવ બાદ ફરી આવું ન બને તે દિશામાં વડોદરા મહાનગરપાલિકા (VMC) દ્વારા વિવિધ કામગીરી કરવામાં આવી રહી છે. ખાસ કરીને વિશ્વામિત્રી નદીની આજુબાજુના બ્રિજોને સુરક્ષિત રાખવા માટે ગેબિયન વોલના મોટા પાયાના કામ માટે બે અલગ-અલગ ટેન્ડરોની દરખાસ્ત સ્થાયી સમિતિ સમક્ષ રજૂ કરવામાં આવી છે. શહેરના વિવિધ બ્રીજ નજીક ગેબિયન વોલ નિર્માણના કુલ રૂ. ૪૨.૭૪ કરોડના અંદાજ સામે ૧૪.૧૩% ના ઓછા દરે રૂ. ૩૬.૭૦ કરોડના ટેન્ડર માટે મે. બેકબોન કન્સ્ટ્રક્શન પ્રા. લિ.ને પસંદ કરાયું છે. બીજી તરફ, શહેરના અન્ય વિસ્તારોમાં સમાન પ્રકારની કામગીરી માટે રૂ. ૪૦.૪૭ કરોડના અંદાજ સામે ૯.૯૯૯% ના ઓછા દરે રૂ. ૩૬.૪૨ કરોડનું બિનશરતી ટેન્ડર મેઇ. દિનેશચન્દ્ર આર. અગ્રવાલ ઇન્ફ્રા પ્રા. લિ. દ્વારા રજૂ કરાયું છે. અહીં ધ્યાન દેવા જેવી વાત એ છે કે, બંને ટેન્ડરોની કામગીરીનું સ્વરૂપ લગભગ સમાન છે. ગેબિયન વોલ દ્વારા નદીકાંઠાના મહત્વપૂર્ણ માળખાંને સુરક્ષિત બનાવવાનું છે. છતાં, બે અલગ ઈજારદારો દ્વારા જુદા જુદા દરે ટેન્ડર રજૂ કરવામાં આવ્યા છે. આ બન્ને કામગીરી માટેના ખર્ચ માટે મહાનગરપાલિકા વિશ્વામિત્રી નદી પુનર્વ્યવસ્થાપન પ્રોજેક્ટના બજેટ હેડમાંથી ખર્ચ કરશે.
