નડિયાદ મહાનગરપાલિકા અને અન્ય પાલિકા-પંચાયતોમાં ચૂંટણીનો માહોલ ગરમાયો
(પ્રતિનિધિ) નડિયાદ, તા.10
ગુજરાતમાં સ્થાનિક સ્વરાજ્યની આગામી ચૂંટણીઓને લઈ રાજકીય ગતિવિધિઓ તેજ બની રહી છે ત્યારે ભારતીય જનતા પાર્ટી દ્વારા ખેડા જિલ્લાની મહત્વની બેઠકો માટે ઉમેદવારોના નામની સત્તાવાર જાહેરાત કરી દેવામાં આવી છે. પ્રદેશ ચૂંટણી સમિતિની બેઠકમાં થયેલી ચર્ચા બાદ નડિયાદ મહાનગરપાલિકા, જિલ્લા પંચાયત, વિવિધ તાલુકા પંચાયતો અને નગરપાલિકાઓ માટે મુરતિયાઓ નક્કી કરવામાં આવ્યા છે. પક્ષ દ્વારા જાહેર કરાયેલી આ યાદીમાં જ્ઞાતિગત સમીકરણો અને જે-તે વિસ્તારના પાયાના કાર્યકરોને પ્રાધાન્ય આપીને ચૂંટણી જંગ જીતવા માટેની રણનીતિ સ્પષ્ટ કરવામાં આવી છે.
નડિયાદ મહાનગરપાલિકાના તમામ 13 વોર્ડ માટે ભારતીય જનતા પાર્ટીએ ઉમેદવારોની જાહેરાત કરી છે. જેમાં વોર્ડ 1માં લીલાબેન પૂનમભાઈ પરમાર, ભાવિશાબેન સુકીતકુમાર પટેલ, સુનિલકુમાર રમણભાઇ સોનારા અને પરેશભાઈ મનુભાઈ પટેલ ચૂંટણી લડશે. વોર્ડ 2માં પિંકલબેન હિતેશભાઈ રબારી, રેખાબેન રમાકાંત મિશ્રા, બકુલભાઈ હરતનભાઇ રબારી અને હર્ષદભાઈ ગોવિંદભાઈ ગોહિલના નામ નક્કી કરાયા છે. વોર્ડ 3માં પ્રવિણાબેન સુરેશભાઈ ટહેલ્યાની, જ્યોતિબેન સૂર્યકાંતભાઈ તળપદા, બાલાભાઈ નાગજીભાઈ ભરવાડ અને હેમાંગકુમાર સંજીવભાઇ પટેલને ટિકિટ મળી છે. વોર્ડ 4માં લાભુબેન અજયભાઈ ભરવાડ, મિતાબેન પિયુષકુમાર પટેલ, શેખર રમેશભાઇ ભીલ અને નૈનેશકુમાર પ્રફુલભાઈ પટેલ ઉમેદવાર રહેશે. વોર્ડ 5માં પુષ્પાબેન ચીમનભાઈ પરમાર, રીમાબેન સ્નેહલકુમાર પટેલ, પરાગ જગદીશચંદ્ર બ્રહ્મભટ્ટ અને મહંમદ રફીક ઇબ્રાહીમભાઇ શાભઇ મેદાનમાં છે. વોર્ડ 6માં રીપુબેન સુશીલભાઈ પટેલ, શાનુ નિતેશભાઈ પટેલ, અમૃતભાઇ રાવજીભાઇ પરમાર અને શિલ્પનકુમાર રાજેન્દ્રભાઈ પટેલના નામ જાહેર થયા છે.
વોર્ડ 7માં ધૃતિબેન ધ્રુવભાઈ પટેલ, મેઘના વિકાસ કુમાર શાહ, ધ્રુવ ભરતભાઈ બારોટ અને ભાવેશકુમાર અશ્વિનભાઇ દેસાઇ ચૂંટણી જંગમાં ઉતરશે. વોર્ડ 8માં ભૂમિબેન દિવ્યેશકુમાર બ્રહ્મભટ્ટ, કરિશ્મા અર્પિતકુમાર પરેરા, જય ભુપેન્દ્રભાઈ વાઘેલા અને શૈલેષકુમાર દિનેશભાઇ પરમારને જવાબદારી સોંપાઈ છે. વોર્ડ 9માં સજ્જન બેન અશોકભાઈ ગોહિલ, કાજલબેન સુનિલભાઈ પટેલ, મયુરકુમાર હર્ષદભાઈ પટેલ અને કલ્પેશકુમાર રાકેશભાઇ રાવળ ઉમેદવારી કરશે. વોર્ડ 10માં ભૂમિકાબેન જતીન પટેલ, મેઘાબેન અલ્પેશકુમાર પટેલ, પ્રકાશભાઈ જાદવભાઈ મિસ્ત્રી અને હિરેન જનકભાઈ પટેલના નામ નક્કી કરાયા છે. વોર્ડ 11માં નીલમબેન રુચિરભાઈ જોશી, પ્રતીક્ષાબેન અવનીશકુમાર જોશી, સમીર કૃષ્ણકાંત બારોટ અને મનીષભાઈ મહેન્દ્રભાઈ પટેલ ચૂંટણી લડશે. વોર્ડ 12માં સેજલબેન મોહનભાઈ રબારી, સ્નેહલબેન વ્રજેશ પટેલ, ગૌરાંગભાઈ શાંતિલાલ પટેલ અને હેમલકુમાર ચીનુભાઇ પટેલને મેદાનમાં ઉતારાયા છે. અંતે વોર્ડ 13માં સોનલબેન ભરતભાઇ તળપદા, કિન્નરીબેન ચિરાગકુમાર શાહ, હિરેનકુમાર સુરેશભાઈ દેસાઈ અને ઇશિત જગદીશભાઈ પટેલના નામની જાહેરાત કરવામાં આવી છે
જિલ્લા પંચાયત અને તાલુકા પંચાયતોમાં પણ ભાજપે પોતાની પકડ મજબૂત કરવા માટે ઉમેદવારોની પસંદગીમાં ચોકસાઈ રાખી છે. ખેડા જિલ્લા પંચાયતની અલવા બેઠક પર રૂપલબેન દિનેશભાઇ પટેલ અને અલીણા બેઠક પર રીનાબેન વિક્રમસિંહ રાઓલજીના નામ નક્કી થયા છે. આ ઉપરાંત નડિયાદ તાલુકા પંચાયતમાં આખડોલ બેઠક પર કિશનકુમાર સોલંકી અને અરેરા બેઠક પર ભલાભાઇ સોઢાને ટિકિટ આપવામાં આવી છે. મહેમદાવાદ તાલુકા પંચાયતમાં આમસરણથી સજનબેન ચૌહાણ અને છાપરાથી રશ્મીકાબેન પટેલ ચૂંટણી લડશે. ગળતેશ્વર, ફાગવેલ અને વસો તાલુકા પંચાયતની બેઠકો માટે પણ ઉમેદવારો જાહેર કરી દેવાતા ગ્રામીણ સ્તરે પણ પ્રચારની તૈયારીઓ આરંભી દેવામાં આવી છે.
નગરપાલિકાઓની વાત કરીએ તો કપડવંજ, કઠલાલ, ઠાસરા અને કણજરી નગરપાલિકામાં પણ વોર્ડ મુજબ ઉમેદવારોની યાદી બહાર પાડવામાં આવી છે. કપડવંજમાં અર્પિતાબેન મકવાણા અને નિલેશભાઇ જામ જેવા ઉમેદવારો નસીબ અજમાવશે. કઠલાલમાં આશાબેન સોઢા અને પંથેશકુમાર પટેલને જવાબદારી સોંપવામાં આવી છે. કણજરી નગરપાલિકામાં વોર્ડ 1માં દર્શનાબેન સુથાર અને વિક્રમસિંહ રાણાના નામની જાહેરાત કરવામાં આવી છે. સમગ્ર ખેડા જિલ્લામાં આ યાદી બહાર પડતાની સાથે જ રાજકીય ગરમાવો આવી ગયો છે અને આગામી દિવસોમાં ફોર્મ ભરવાની પ્રક્રિયા સાથે પ્રચાર યુદ્ધ વધુ આક્રમક બને તેવા એંધાણ વર્તાઈ રહ્યા છે.
