અગાઉ કોર્પોરેશનમાં વિશ્વામિત્રી પ્રોજેક્ટ માટે 20 ટકા વધુના ભાવથી કામ કરવાની દરખાસ્ત આવી હતી
સિંચાઇ વિભાગમાં 40 ટકા ઓછા ભાવથી વિશ્વામિત્રી પ્રોજેક્ટ પર કામ કરવા ઈજારદારની તૈયારી
વિશ્વામિત્રી નદીના કામ માટે હાલ કોર્પોરેશન અને સિંચાઇ વિભાગની ટેન્ડરિંગ પ્રક્રિયા ચાલી રહી છે, જેમાં બંને વિભાગો વચ્ચે ચર્ચાઓનો માહોલ ગરમાઈ રહ્યો છે. ગત મહિનામાં સિંચાઇ વિભાગે શહેર બહાર પસાર થતી વિશ્વામિત્રી નદીની કામગીરી માટે ટેન્ડર જાહેર કર્યા હતા, જેમાં ભાગ લેનાર ઇજારદારો દ્વારા સરેરાશ 40 ટકા ઓછા દર સાથે કામ કરવા માટે તૈયારી દર્શાવાઈ છે. જેને લઇને હવે ચર્ચાઓ શરૂ થઈ છે. ઉલ્લેખનીય છે કે, કોર્પોરેશનની સ્થાયી સમિતિમાં અગાઉ વિશ્વામિત્રી પ્રોજેક્ટના બે ટેન્ડર રજૂ કરાયા હતા, જેમાં બે ઇજારદારને શહેરમાંથી પસાર થતી વિશ્વામિત્રી નદીના કામ સોંપવાનો પ્રતિસાદ સરેરાશ 20 ટકા વધુના ભાવે કામ આપવા દરખાસ્ત આવી હતી.
હાલમાં, સિંચાઇ વિભાગ દ્વારા જાહેર કરાયેલા ટેન્ડર માટે જવાબદાર ઇજારદારો 40 ટકા ઓછા ભાવ સાથે કામ કરવા સંમત થયા છે, જે આજે સિંચાઇ વિભાગનું ટેન્ડર ઓપન થતા સ્પષ્ટ થયું છે. ઉલ્લેખનીય છે કે, વડોદરા શહેરમાંથી પસાર થતી વિશ્વામિત્રી નદીના ડીસિલ્ટિંગ તથા અન્ય કામો માટે કોર્પોરેશન દ્વારા જે તે સમયે 20 ટકા વધારે દરથી ટેન્ડર ગયા હતા. ત્યારે હવે ચર્ચાઓ શરૂ થઈ છે કે, સિંચાઇ વિભાગના નિયમો મુજબ રિટેન્ડર કરનાર કોર્પોરેશન શું હવે સિંચાઇ વિભાગના ભાવ પ્રમાણે કામ કરશે કે કેમ ?
ગત માસમાં યોજાયેલી કોર્પોરેશનની સ્થાયી સમિતિની બેઠકમાં વિશ્વામિત્રી નદીના ડીસિલ્ટિંગ અને અન્ય કામોને લઈને કામોની દરખાસ્ત કરવામાં આવી હતી. આ બેઠકમાં નદીનું ડીસિલ્ટિંગ 20.80 ટકા વધુ દરે શિવાલય ઇન્ફ્રા પ્રો. પ્રા. લિ. અને કાંસોનું ડીસિલ્ટિંગ 20.50 ટકા વધુ દરે શાંતિલાલ બી. પટેલને આપવાની દરખાસ્ત કરવામાં આવી હતી. છતાં, આ બંને દરખાસ્તોને સમિતિ દ્વારા નામંજૂર કરવામાં આવી હતી. વિશિષ્ટ છે કે આ કામ માટે સરકારી સિંચાઇ વિભાગના ટેન્ડર માપદંડો અનુસાર કામ કરવાનું સુચન આપવામાં આવ્યું હતું, અને ચાર અલગ-અલગ પેકેજમાં ટેન્ડર જાહેર કરવા નિર્ણય લેવાયો હતો.
