વડોદરા શહેરમાં ઠેર ઠેર જળબંબાકારની સ્થિતિ, વાહનવ્યવહાર ઠપ; સદનસીબે મોટી જાનહાની ટળી
વડોદરા: શહેરમાં આખી રાત પડેલા કમોસમી ધોધમાર વરસાદને કારણે જનજીવન અસ્તવ્યસ્ત થઈ ગયું હતું. જ્યાં જુઓ ત્યાં પાણી ભરાયાં હતા. નીચાણવાળા વિસ્તારોમાં પાણીનો ભરાવો થતાં વાહનવ્યવહાર ખોરવાઈ ગયો હતો, તો અનેક વાહનો વરસાદી પાણીમાં ખોટકાઈ ગયા હોવાના અહેવાલ હતા. આવી પરિસ્થિતિ વચ્ચે, ભારે વરસાદને પગલે શહેરના તુલસીવાડી વિસ્તારમાં એક મોટી દુર્ઘટના સર્જાઈ હતી. તુલસીવાડી વિસ્તારમાં મંદિરની દીવાલ અચાનક ધરાશાયી થતાં ત્યાં પાર્ક કરેલા અનેક વાહનો તેના કાટમાળ નીચે દબાઈ ગયા હતા. દીવાલ પડવાની ઘટનાના પગલે સ્થાનિકોમાં દોડધામ મચી ગઈ હતી.
પ્રાથમિક માહિતી મુજબ, ભારે વરસાદના કારણે દીવાલ નબળી પડી જતાં તે એકાએક તૂટી પડી હતી. દીવાલ ધરાશાયી થવાના કારણે નીચે પાર્ક કરેલી એક કાર, બાઈક અને રીક્ષા સહિતના વાહનોને ભારે નુકસાન પહોંચ્યું છે.
જોકે, રાહતની વાત એ છે કે આ ઘટનામાં કોઈ જાનહાનિ થઈ હોવાના સમાચાર મળ્યા નથી. ઘટનાની જાણ થતાં જ તાત્કાલિક સ્થાનિકો દ્વારા કાટમાળ હટાવવાની કામગીરી શરૂ કરવામાં આવી હતી.
શહેરમાં કમોસમી વરસાદના કારણે ઠેર ઠેર પાણી ભરાવા અને વાહનો ખોટકાવાના બનાવો બની રહ્યા છે, ત્યારે તુલસીવાડીની આ ઘટનાએ તંત્રની માળખાગત સુવિધાઓની જાળવણી પર સવાલો ઉભા કર્યા છે. ભારે વરસાદને કારણે જર્જરિત કે જૂની દીવાલો અને ઇમારતો જોખમી બની શકે છે, ત્યારે શહેરીજનો અને તંત્રે વિશેષ સાવધાની રાખવી જરૂરી છે. હાલમાં નુકસાન પામેલા વાહનોના માલિકોમાં રોષ જોવા મળી રહ્યો છે અને તેઓએ તાત્કાલિક વળતરની માંગ કરી છે.
