યુનાઇટેડ સ્ટેટ્સમાં રાષ્ટ્રપતિ ડોનાલ્ડ ટ્રમ્પની સુરક્ષાને લઈને એક ગંભીર ઘટના સામે આવી છે. ફ્લોરિડાના વેસ્ટ પામ બીચમાં માર-એ-લાગો કોમ્પ્લેક્સની બહાર એક વ્યક્તિ ઇંધણનો ડબ્બો લઈ રિસોર્ટમાં પ્રવેશ કરવાની કોશિશ કરી રહ્યો હતો. જેથી ત્યાં હાજર સુરક્ષા કર્મચારીઓએ તેના પર ગોળીબાર કર્યો હતો, જેના પરિણામે 20 વર્ષીય વ્યક્તિનું મોત થયું હતું. આ ઘટના Mar-a-Lago રિસોર્ટના નોર્થ ગેટ પાસે બની હતી, જે West Palm Beach વિસ્તારમાં આવેલું છે. એજન્સી દ્વારા આપવામાં આવેલી માહિતી અનુસાર, આશરે 20 વર્ષનો એક યુવાન રવિવારે વહેલી સવારે લગભગ 1:30 વાગ્યે રિસોર્ટની બહાર જોવા મળ્યો હતો. તે સમયે ટ્રમ્પ વોશિંગ્ટનમાં હાજર હતા. સિક્રેટ સર્વિસના અહેવાલ મુજબ, યુવાન પાસે એક શંકાસ્પદ હથિયાર હતું, જે શોટગન અને ઇંધણનો ડબ્બો હોવાનું જણાતું હતું. સુરક્ષા એજન્ટોએ જણાવ્યું કે તે વ્યક્તિ સુરક્ષા એરિયાને ઓળંગીને અંદર પ્રવેશવાનો પ્રયાસ કરી રહ્યો હતો. પરિસ્થિતિ ગંભીર બનતાં એજન્ટોએ તેના પર ગોળીબાર કર્યો. ઘટનાના બાદ તેને સારવાર માટે ખસેડવામાં આવ્યો હતો, પરંતુ તે બચી શક્યો નહીં. હાલમાં તેની ઓળખ જાહેર કરવામાં આવી નથી અને તેની યોજના શું હતી તે અંગે પણ તપાસ ચાલુ છે.
જોકે ઘટના સમયે ડોનાલ્ડ ટ્રમ્પ ફ્લોરિડામાં નહોતા. તેઓ શનિવારે રાત્રે ગવર્નર્સ ડિનરમાં હાજરી આપવા માટે વોશિંગ્ટન ડી.સી. ગયા હતા અને ત્યાં રાત રોકાયા હતા. ગુપ્ત સેવાએ એક સત્તાવાર નિવેદન જારી કરીને પુષ્ટિ આપી છે કે ઘટના સમયે માર-એ-લાગોમાં કોઈ VIP કે સંરક્ષિત કર્મચારી હાજર નહોતા. એન્કાઉન્ટરમાં કોઈ એજન્ટ કે પોલીસ અધિકારી ઘાયલ થયા નથી. આ ઘટનાને લઈને વ્હાઇટ હાઉસ તરફથી તાત્કાલિક કોઈ સત્તાવાર નિવેદન આપવામાં આવ્યું નથી. જોકે, છેલ્લા કેટલાક વર્ષોમાં અમેરિકામાં રાજકીય હિંસાની ઘટનાઓમાં વધારો નોંધાયો છે. વર્ષ 2024 દરમિયાન ટ્રમ્પ પર બે વખત હુમલાનો પ્રયાસ થયો હતો, જેમાંથી એક ઘટના વેસ્ટ પામ બીચ ખાતે આવેલા તેમના ગોલ્ફ કોર્સ પર બની હતી. આ ઉપરાંત, જૂન 2025માં મિનેસોટા રાજ્યમાં ડેમોક્રેટિક ધારાસભ્ય મેલિસા હોર્ટમેન અને તેમના પતિની ગોળી મારીને હત્યા કરવામાં આવી હતી. ત્યારબાદ થોડા મહિનાઓમાં જ રૂઢિચુસ્ત કાર્યકર્તા ચાર્લી કિર્કની પણ હત્યા કરવામાં આવી હતી. આ બનાવોએ દેશમાં રાજકીય નેતાઓ અને જાહેર પ્રતિનિધિઓની સુરક્ષા અંગે ગંભીર ચિંતાઓ ઊભી કરી છે. તાજેતરની આ ઘટના બાદ ફરી એકવાર ઉચ્ચ સ્તરીય સુરક્ષા વ્યવસ્થાઓ અને રાજકીય હિંસાને લઈને ચર્ચા તેજ બની છે. તપાસ એજન્સીઓ હવે સમગ્ર મામલે વિસ્તૃત તપાસ કરી રહી છે અને રિસોર્ટની આસપાસની સુરક્ષા વધુ કડક બનાવવામાં આવી છે.
