રશિયા (Russia) અને યુક્રેન (Ukraine) વચ્ચે બે વર્ષથી વધુ સમયથી યુદ્ધ (War) ચાલી રહ્યું છે અને અત્યારે તે અટકવાના કોઈ સંકેત નથી. આ દરમિયાન કંઈક એવું બન્યું છે જેણે સમગ્ર વિશ્વની ચિંતા વધારી દીધી છે. રશિયાએ દાવો કર્યો છે કે યુક્રેને ઝાપોરિઝિયા ન્યુક્લિયર પ્લાન્ટ પર ડ્રોન વડે હુમલો કર્યો છે. ઇન્ટરનેશનલ એટોમિક એનર્જી એજન્સી (IAEA)એ પણ આ હુમલાને ઘાતક ગણાવ્યો છે. IAEAએ કહ્યું છે કે પરમાણુ પ્લાન્ટ નજીક ડ્રોન હુમલો ખતરનાક કૃત્ય છે.
આ એક ગંભીર ઘટના છે
ઇન્ટરનેશનલ એટોમિક એનર્જી એજન્સી (IAEA) એ એક અલગ નિવેદન બહાર પાડીને રિએક્ટર સહિત પ્લાન્ટ પર ડ્રોન હુમલાની અસરની પુષ્ટિ કરી છે. IAEA એ જણાવ્યું હતું કે યુનિટ 6 પરના નુકસાનથી પરમાણુ સુરક્ષા માટે કોઈ ખતરો નથી પરંતુ તે એક ગંભીર ઘટના છે જે રિએક્ટરની કન્ટેઈનમેન્ટ સિસ્ટમને નબળી બનાવે તેવી શક્યતા છે.
રશિયાએ શું કહ્યું?
હુમલા અંગે રશિયન-નિયંત્રિત ઝાપોરિઝિયા ન્યુક્લિયર પાવર પ્લાન્ટના અધિકારીઓએ કહ્યું છે કે રવિવારે પ્લાન્ટ પર યુક્રેનિયન લશ્કરી ડ્રોન દ્વારા હુમલો કરવામાં આવ્યો હતો જેમાં પ્લાન્ટના છઠ્ઠા પાવર યુનિટના ગુંબજ પર હુમલો પણ સામેલ હતો. પ્લાન્ટના અધિકારીઓએ જણાવ્યું હતું કે આ ઘટનામાં કોઈ મોટું નુકસાન થયું નથી અને કોઈ જાનહાનિ થઈ નથી. હુમલા પછી પ્લાન્ટમાં રેડિયેશનનું સ્તર સામાન્ય રહ્યું હતું પરંતુ બાદમાં રવિવારે રશિયન પરમાણુ એજન્સી રોસાટોમે જણાવ્યું હતું કે અણધાર્યા ડ્રોન હુમલામાં ત્રણ લોકો ઘાયલ થયા છે.
ઇન્ટરનેશનલ એટોમિક એનર્જી એજન્સીએ રવિવારે કહ્યું કે તેના નિષ્ણાતોને ડ્રોન હુમલાની જાણકારી આપવામાં આવી છે. સંયુક્ત રાષ્ટ્રની પરમાણુ દેખરેખ એજન્સીના વડા રાફેલ મારિયાનો ગ્રોસીએ આવા હુમલાઓથી થતા સુરક્ષા ખતરા અંગે ચેતવણી આપી છે. “હું તમને વિનંતી કરું છું કે એવી ક્રિયાઓ કરવાથી બચો જે IAEA ના સિદ્ધાંતોની વિરુદ્ધ જાય અને પરમાણુ સુરક્ષાને અસર કરે,” તેમણે એક રિએક્ટર પરના ડ્રોન હુમલાને કારણે લખ્યું કે મોટી પરમાણુ દુર્ઘટનાનું જોખમ નોંધપાત્ર રીતે વધી ગયું છે. ગ્રોસીએ સોશિયલ મીડિયા પ્લેટફોર્મ ‘X’ પર જાહેર કરેલા એક નિવેદનમાં પુષ્ટિ કરી કે ઝાપોરિઝિયા ન્યુક્લિયર પાવર પ્લાન્ટ મુખ્ય રિએક્ટર કંટ્રોલ સ્ટ્રક્ચર્સ પર ઓછામાં ઓછા ત્રણ સીધા હુમલાઓ થયા હતા. તેમણે કહ્યું કે નવેમ્બર 2022 પછી આ પ્રકારનો આ પહેલો હુમલો છે.
