“પોપે સમજવું પડશે કે આ વાસ્તવિક દુનિયા છે”
અમેરિકા અને ઈરાન વચ્ચે વધતા તણાવ ને લઇ અમેરિકાના રાષ્ટ્રપતિ ડોનાલ્ડ ટ્રમ્પે પોપ લિઓ XIV પર પ્રતિક્રિયા આપતા કહ્યું કે પોપ વિશ્વના મુદ્દાઓ પર પોતાની વાત રાખવા માટે સ્વતંત્ર છે, પરંતુ તેમને “આ વાસ્તવિક દુનિયા છે” તે સમજવું જરૂરી છે. ટ્રમ્પે ઈરાનને વૈશ્વિક સ્તરે ગંભીર ખતરો ગણાવતા કહ્યું કે ઈરાનને ક્યારેય પરમાણુ હથિયાર મેળવવાની મંજૂરી આપી શકાય નહીં.
તાજેતરમાં પોપ લિઓ XIVએ અમેરિકા–ઇઝરાયેલ દ્વારા ઈરાન સામે ચાલી રહેલી સૈન્ય કાર્યવાહી પર ચિંતા વ્યક્ત કરી હતી અને યુદ્ધને “પાગલપણું” ગણાવી તાત્કાલિક શાંતિ માટે અપીલ કરી હતી. પોપના આ નિવેદનો બાદ ટ્રમ્પ અને વેટિકન વચ્ચે શબ્દયુદ્ધ વધુ તેજ બન્યું છે. ટ્રમ્પે સ્પષ્ટ કર્યું કે તેમને પોપ સામે કોઈ વ્યક્તિગત વિરોધ નથી, પરંતુ વૈશ્વિક સુરક્ષા મુદ્દાઓમાં ઈરાનની ભૂમિકા ગંભીર છે અને તેને અવગણવી શક્ય નથી. તેમણે ફરી ભારપૂર્વક કહ્યું કે ઈરાન પરમાણુ હથિયાર મેળવશે તો વિશ્વ માટે મોટું જોખમ ઉભું થઈ શકે છે.
આ વિવાદ તે સમયે વધુ ચર્ચામાં આવ્યો છે જ્યારે ફેબ્રુઆરી 2026માં અમેરિકા અને ઇઝરાયેલ દ્વારા ઈરાન પર સંયુક્ત હુમલાઓ થયા બાદ મધ્ય પૂર્વમાં તણાવ વધ્યો હતો. આ હુમલાઓના જવાબમાં ઈરાને ઇઝરાયેલ અને અમેરિકાના સહયોગી દેશોમાં આવેલા સૈન્ય ઠેકાણાઓ પર મિસાઈલ અને ડ્રોન હુમલાઓ કર્યા હતા, જેના કારણે હજારો લોકોના મોત થયા અને લાખો લોકો સ્થળાંતર કરવા મજબૂર બન્યા હતા.
પોપ લિઓ XIVએ પોતાના નિવેદનમાં યુદ્ધના બદલે શાંતિ અને કૂટનીતિને પ્રાથમિકતા આપવાની વાત કરી હતી અને જણાવ્યું હતું કે માનવતાને ધ્યાનમાં રાખીને રાજકીય નિર્ણયો લેવાં જરૂરી છે. બીજી તરફ ટ્રમ્પે કહ્યું કે વૈશ્વિક સુરક્ષાને ધ્યાનમાં રાખીને કઠોર નિર્ણયો લેવાં અનિવાર્ય છે.આ સમગ્ર મુદ્દે અમેરિકામાં રાજકીય તેમજ ધાર્મિક વર્તુળોમાં ચર્ચા તેજ બની છે અને ટ્રમ્પ તથા પોપ વચ્ચેનો મતભેદ આંતરરાષ્ટ્રીય રાજનીતિમાં મહત્વપૂર્ણ વિષય બન્યો છે.
