સમલૈગિંક લગ્નનો મામલો કોર્ટ અને સરકારની ભારે કસોટી કરશે

જ્યારે માનવ ધરતી પર વસતો થયો ત્યારે લગ્ન પ્રથા અસ્તિત્વમાં નહોતી. માનવ ત્યારે હાલના પ્રાણીઓની જેમ જ રહેતો હતો. સમયાંતરે અનેક ફેરફારો આવ્યા અને કયા વંશજો કોના છે તે નક્કી કરી શકાય અને એક યોગ્ય સમાજનું નિર્માણ કરી શકાય તે માટે લગ્નપ્રથા અસ્તિત્વમાં આવી હતી. જ્યારથી લગ્નપ્રથા અસ્તિત્વમાં આવી ત્યારથી શરૂ કરીને આજ સુધી વિજાતીય પાત્રો વચ્ચે લગ્નો થતાં આવ્યા છે. અત્યાર સુધી ક્યારેય પણ સમલૈંગિક લગ્નોને ભારત દેશમાં માન્યતા આપવામાં આવી નથી પરંતુ દરેક વ્યક્તિને પોતાનો સાથી નક્કી કરવાનો મુળભૂત અધિકાર છે તેવો મુદ્દો ઉઠાવીને હવે સમલૈંગિક લગ્નોને પણ માન્યતા આપવાની માંગણી ઉઠી છે અને તેને કારણે મોટો વિવાદ છેડાયો છે કે શું સમલૈંગિક લગ્નોને માન્યતા આપવી જોઈએ કે કેમ?

સમલૈગિંક લગ્નનો મામલો કોર્ટ અને સરકારની ભારે કસોટી કરશે

આ મુદ્દો એના પરથી આવ્યો કે તાજેતરમાં બે કપલ દ્વારા દિલ્હી હાઈકોર્ટમાં તેમના સમલૈંગિક લગ્નોને માન્યતા આપવા માટે દાદ માંગવામાં આવી. આ બંને કપલને તેમના લગ્નની નોંધણી કરવા દેવાથી અટકાવવામાં આવ્યા હતા. બે પૈકી એક કપલ એવું છે કે જેણે ન્યુયોર્કમાં લગ્ન કર્યા હતા પરંતુ ભારતી એમ્બેસીમાં ત્યાં લગ્નની નોંધણી થઈ શકી નહોતી. જ્યારે બીજું કપલ ભારતનું જ છે. સમલૈંગિક લગ્નોને માન્યતા આપવા માટે આ પહેલા પણ એક વખત કોર્ટમાં અરજી કરવામાં આવી હતી. આ સમયે કેન્દ્ર સરકાર દ્વારા એવો જવાબ આપવામાં આવ્યો હતો કે ભારતની સંસ્કૃતિમાં આવા લગ્નોને સ્થાન નથી. જેથી તેને કાયદા દ્વારા માન્યતા આપી શકાય નહીં.

આ અરજી બાદ હવે ફરી આવો મામલો દિલ્હી હાઈકોર્ટ સમક્ષ આવ્યો છે અને તેને કારણે દિલ્હી હાઈકોર્ટ દ્વારા તેની સુનાવણીનો પ્રારંભ કરવામાં આવ્યો છે. આગામી તા.8મી જાન્યુ., 2021ના રોજ તેની સુનાવણી થશે. બંને કપલ દ્વારા એવી માંગણી કરવામાં આવી છે કે તેમના સમલૈંગિક લગ્નોને સ્પેશિયલ મેરેજ એક્ટ હેઠળ સામેલ કરવામાં આવે અને તેને માન્યતા આપવામાં આવે. દિલ્હી હાઈકોર્ટએ ત્યાં સુધી કહ્યું છે કે આ સ્પેશિયલ અરજી છે અને તેને કેન્દ્ર સરકારે ગંભીરતાથી લેવાની જરૂરીયાત છે. આ મુદ્દો નાગરિકના અધિકારીનો સાવલ છે અને દિલ્હી હાઈકોર્ટ આ નોટિસનો જવાબ આપે. પ્રારંભિક સુનાવણી દરમ્યાન લગ્ન રજિસ્ટ્રારના વકીલે એવો મુદ્દો રજૂ કર્યો હતો કે સનાતન ધર્મના 5000 વર્ષના ઈતિહાસમાં આ પ્રકારનો કેસ ક્યારેય આવ્યો નથી. હાઈકોર્ટમાં અરજી કરનાર કપલ અરજદારે એવી દાદ માંગી હતી કે જ્યારે તેઓ તેમના લગ્નનું રજીસ્ટ્રેશન કરાવવા માટે ગયા ત્યારે એવો મુદ્દો ઉપસ્થિત કરાયો હતો કે તે સમલૈંગિક હોવાથી તેમના લગ્નની નોંધણી થઈ શકે નહીં.

અરજદારના વકીલે એવી દલીલ કરી હતી કે સમાન લિંગ હોય તો લગ્નની ના પાડીને ભેદભાવ રાખી શકાય નહીં. વિવાહના નિયમને પ્રકૃતિ સાથે જોડવા જોઈએ નહીં તે કાયદા સાથે જોડાયેલો મુદ્દો છે. દિલ્હી હાઈકોર્ટમાં રજૂ થયેલા સમલૈંગિક લગ્નોનો મામલો અતિ ચર્ચાસ્પદ છે. કારણકે આ મુદ્દાને જો મંજૂરી આપવામાં આવે તો ભારતીય સંસ્કૃતિમાં ધરમૂળથી ફેરફાર આવે તેમ છે. સમલૈગિંક લગ્નનો મુદ્દો એ કાયદાને લગતા પ્રશ્ન કરતાં વધુ સમાજનો લગતો પ્રશ્ન છે. લગ્નપ્રથાને સંલગ્ન પ્રશ્ન વધારે છે. કારણ કે પ્રકૃતિ એવું કહે છે કે સમલૈંગિક વચ્ચે લગ્નો હોઈ શકે નહીં. સમાજ પણ તેને સ્વીકૃતિ આપે કે કેમ? તે મોટો પ્રશ્ન છે.

તો બીજી તરફ ભારતીય બંધારણ એવું કહે છે કે પ્રત્યેક વ્યક્તિને પોતાના સાથીની પસંદગીનો મુળભૂત અધિકાર છે.કેન્દ્ર સરકાર માટે આ કારણે જ સમલૈંગિક લગ્નોને માન્યતા આપવી કે કેમ? તે મોટો યક્ષપ્રશ્ન બની ગયો છે. વિશ્વમાં અને ભારતમાં પણ સમલૈંગિક વચ્ચે સંબંધો હોય તેવા અનેક કપલો છે પરંતુ તેને માન્યતા આપવી કે કેમ? તે મુદ્દે અનેક મતમતાંતરો છે. હવે આ મામલે કોર્ટ અને કેન્દ્ર સરકારની મોટી કસોટી પણ થશે કે આ મામલે શું નિર્ણય લેવો?

Related Posts