ગાંધીનગર : કચ્છના જખૌ દરિયામાંથી ૩૮૪ કરોડનું હેરોઈન ઘુસાડવાના કેસમાં ભુજની સ્પેશિયલ એન.ડી.પી.એસ. કોર્ટે ૬ પાકિસ્તાની આરોપીઓને ૨૦ વર્ષની સખત કેદની સજા અને પ્રત્યેકને રૂપિયા બે લાખના દંડનો હુકમ કર્યો છે.
કચ્છના જખૌ દરિયાઈ સીમામાંથી એ.ટી.એસ. અને ભારતીય કોસ્ટગાર્ડે સંયુક્ત ઓપરેશન હાથ ધરી ૨૦ ડિસેમ્બર ૨૦૨૧ના રોજ મધરાત્રે જખૌથી ૩૫ નોટિકલ માઈલ દૂર શંકાસ્પદ બોટને આંતરીને તપાસ કરતા તેમાંથી ૭૬,૯૩૬ ગ્રામ (આશરે ૭૭ કિલો) હેરોઈન જેની આંતરરાષ્ટ્રીય બજારમાં કિંમત ૩૮૪ કરોડનો જથ્થો જપ્ત કરી ૬ પાકિસ્તાની નાગરિકો મોહમદ ઇમરાન મોહમ્મદ તારીક વાઘેર, દાનિસ મોહમ્મદ હુશેન કચ્છી વાઘેર, સાગર મોહમ્મદ કચ્છી વાઘેર, ઇસ્માઇલ ઇબ્રાહીમ બડાલા, મોહમદ સાજીદ મોહમ્મદ હુશેન યાકુબલાલા કુંગરા અને અશ્ફાક મોહમ્મદ ઇશાક વાઘેર તમામ રહે, કરાચી, પાકિસ્તાનની ધરપકડ કરી હતી.
આ તમામ કેસમાં ભુજની સ્પેશિયલ એન.ડી.પી.એસ. કોર્ટેમાં કેસ દાખલ થતાં ભુજ એડિશનલ સેશન્સ અને સ્પેશિયલ એન.ડી.પી.એસ. કોર્ટના જજ વી.એ. બુધ્ધએ ચુકાદો આપતા નોંધ્યું હતુ કે આરોપીઓએ ભારતના યુવાનોને નશીલા પદાર્થોના રવાડે ચડાવી રાષ્ટ્રના માળખાને નબળું પાડવાનું સુનિયોજિત કાવતરું ઘડ્યું હતું. નશાની આ સમસ્યા માત્ર વ્યક્તિગત નથી પરંતુ રાષ્ટ્રીય સુરક્ષા માટે મોટું સંકટ છે. આવા ગંભીર ગુનામાં કોઈ પણ પ્રકારની નરમાઈ દાખવી શકાય નહીં. આ કેસમાં સરકાર તરફથી મુખ્ય જિલ્લા સરકારી વકીલએ દલીલો કરી કેસ દરમિયાન ૨૦૩ દસ્તાવેજી પુરાવા અને ૧૩ સાક્ષીઓની તપાસમાં આવ્યાં હતા. ભુજ એડિશનલ સેશન્સ અને સ્પેશિયલ એન.ડી.પી.એસ. કોર્ટમાં કેસ ચાલી જતાં રૂ. ૩૮૪ કરોડનું હેરોઈન ઘુસાડવાના કેસમાં ૬ પાકિસ્તાની આરોપીઓને ૨૦ વર્ષની સખત કેદની સજા અને પ્રત્યેકને રૂપિયા બે લાખના દંડનો હુકમ કર્યો હતો.
