સાઉદી અરેબિયા અને હૂતી વિદ્રોહીઓ વચ્ચે વધી રહેલા સૈન્ય તણાવ વચ્ચે પાકિસ્તાને સાઉદી અરેબિયાની સુરક્ષા માટે પોતાની સૈન્ય ક્ષમતાઓ ઉપલબ્ધ કરાવવાની જાહેરાત કરી છે.પાકિસ્તાનના રક્ષા મંત્રી ખ્વાજા આસિફે જણાવ્યું છે કે નવા મક્કા સંયુક્ત સંરક્ષણ કરાર હેઠળ સાઉદી અરેબિયાની રક્ષા માટે પાકિસ્તાન પોતાની પાસે ઉપલબ્ધ દરેક સંભવિત સાધનનો ઉપયોગ કરી શકે છે. જોકે, તેમણે પાકિસ્તાની સેનાએ સાઉદી અરેબિયાની તરફથી કોઈ હવાઈ હુમલામાં ભાગ લીધો છે કે નહીં તેની સ્પષ્ટ પુષ્ટિ કરી નથી.
ખ્વાજા આસિફે રોમમાં પત્રકારો સાથેની વાતચીત દરમિયાન કહ્યું કે જો કરાર હેઠળ પાકિસ્તાન સાઉદી અરેબિયાની રક્ષા માટે બંધાયેલું છે,તો પાકિસ્તાન પાસે ઉપલબ્ધ સૈન્ય ક્ષમતાઓ સાઉદી અરેબિયા માટે પણ ઉપલબ્ધ રહેશે. તેમણે સાઉદી અરેબિયાના કોઈ સત્તાવાર સૈન્ય સહાયના આગ્રહ વિશે પણ સ્પષ્ટ માહિતી આપી નથી. આ નિવેદન એવા સમયે આવ્યું છે જ્યારે યમનના ઈરાન સમર્થિત હૂતી જૂથ દ્વારા સાઉદી અરેબિયા સામે મિસાઇલ અને ડ્રોન હુમલાઓ વધ્યા હોવાના અહેવાલો છે.પાકિસ્તાન, સાઉદી અરેબિયા અને તુર્કીએ 7 ઓગસ્ટ 2026ના રોજ મક્કા સંયુક્ત સંરક્ષણ કરાર પર હસ્તાક્ષર કર્યા હતા. આ કરાર મુજબ ત્રણમાંથી કોઈ એક દેશ પર સશસ્ત્ર હુમલો થાય તો તેને ત્રણેય દેશો પર હુમલા તરીકે ગણવામાં આવશે. ત્રણેય દેશોએ આ કરારને રક્ષણાત્મક ગણાવ્યો છે અને કોઈ ચોક્કસ દેશ વિરુદ્ધ બનાવવામાં આવ્યો નથી તેમ જણાવ્યું છે. જોકે કરારની સંપૂર્ણ વિગતો જાહેર કરવામાં આવી નથી અને તેની કમાન્ડ તથા ઓપરેશનલ વ્યવસ્થા હજુ વિકસાવવામાં આવી રહી છે.
હૂતી હુમલાઓને લઈને પાકિસ્તાન, સાઉદી અરેબિયા અને તુર્કીના સૈન્ય વડાઓની તાજેતરમાં રિયાધમાં બેઠક પણ થઈ હતી. તેમાં ગુપ્તચર માહિતીની આપ-લે, સૈન્ય સંકલન અને ત્રણેય દેશોની સૈન્ય ક્ષમતાઓને વધુ એકીકૃત કરવા અંગે ચર્ચા થઈ હતી. ખાસ કરીને સાઉદી અરેબિયાના સુરક્ષા માળખા અને મહત્વપૂર્ણ વિસ્તારો સામેના હુમલાઓ અંગે ચર્ચા કરવામાં આવી હતી.ખ્વાજા આસિફે હૂતી જૂથના હુમલાઓને કારણે બાબ અલ-મંદેબ જળમાર્ગની સુરક્ષા અંગે પણ ચિંતા વ્યક્ત કરી છે.મહત્વપૂર્ણ સમુદ્રી માર્ગ વૈશ્વિક વેપાર માટે અત્યંત મહત્વ ધરાવે છે. હૂતી જૂથની પ્રવૃત્તિઓ અને યમનના કિનારાના વિસ્તારોમાં તેની વધતી પહોંચને કારણે સાઉદી તેલ સુવિધાઓ અને સમુદ્રી પરિવહન સામે પણ જોખમ ઊભું થયું હોવાનો પાકિસ્તાનનો દાવો છે.
જોકે પાકિસ્તાન સાઉદી અરેબિયાને સૈન્ય સહાય આપવાની તૈયારી દર્શાવી રહ્યું છે, બીજી તરફ ઈરાન સાથે રાજદ્વારી સંપર્ક જાળવી રાખવાની વાત પણ કરી રહ્યું છે. પાકિસ્તાનનું કહેવું છે કે તે મધ્યપૂર્વમાં વધતા સંઘર્ષને વધુ વિસ્તરતો અટકાવવા માટે વાટાઘાટો અને રાજદ્વારી પ્રયાસોને સમર્થન આપે છે. તેથી આગામી દિવસોમાં મક્કા ડિફેન્સ પેક્ટનો વાસ્તવિક અમલ કયા સ્વરૂપમાં થાય છે અને સાઉદી અરેબિયા તરફથી કોઈ સત્તાવાર સૈન્ય સહાયની માંગ કરવામાં આવે છે કે નહીં તેના પર સમગ્ર ક્ષેત્રની સુરક્ષા સ્થિતિની નજર રહેશે.
