કેનેડાના સૌથી મોટા શહેર ટોરોન્ટોમાં યોજાઈ રહેલા પ્રખ્યાત સ્ટ્રીટ ફેસ્ટિવલ દરમિયાન શનિવારે રાત્રે થયેલા અંધાધૂંધ ગોળીબારે સમગ્ર શહેરને હચમચાવી દીધું છે. મિડટાઉન ટોરોન્ટોમાં દર વર્ષે યોજાતા લોકપ્રિય લેટિન સાંસ્કૃતિક ઉત્સવ ‘સાલ્સા ઓન સેન્ટ ક્લેયર’ દરમિયાન એક અજાણ્યા હુમલાખોરે ભીડ વચ્ચે અંધાધૂંધ ફાયરિંગ કર્યું હતું. આ ભયાનક ઘટનામાં બે લોકોના મોત થયા છે, જ્યારે અન્ય ત્રણ લોકો ગંભીર રીતે ઘાયલ થયા છે. ઘાયલોને તાત્કાલિક નજીકની હોસ્પિટલમાં દાખલ કરવામાં આવ્યા છે, જ્યાં તેમની સારવાર ચાલી રહી છે. ટોરોન્ટો પોલીસ સર્વિસના જણાવ્યા અનુસાર, આ ઘટના શનિવારે રાત્રે લગભગ 8 વાગ્યા બાદ સેન્ટ ક્લેયર એવેન્યુ વેસ્ટ અને અર્લિંગ્ટન એવેન્યુ નજીક બની હતી. તે સમયે હજારો લોકો સંગીત, નૃત્ય અને વિવિધ સાંસ્કૃતિક કાર્યક્રમોની મજા માણી રહ્યા હતા. અચાનક ગોળીબાર શરૂ થતાં જ સમગ્ર વિસ્તારમાં અફરાતફરી મચી ગઈ હતી. લોકો જીવ બચાવવા માટે અહીં-ત્યાં દોડવા લાગ્યા, જેના કારણે થોડા સમય માટે ભગદડ જેવી સ્થિતિ સર્જાઈ હતી.
ઘટનાની જાણ થતાં જ ટોરોન્ટો પોલીસ, ફાયર વિભાગ અને ઇમરજન્સી મેડિકલ સર્વિસની ટીમો તરત જ સ્થળ પર પહોંચી ગઈ હતી. પોલીસને ઘટનાસ્થળેથી પાંચ લોકો ગોળી વાગેલી હાલતમાં મળી આવ્યા હતા. તબીબોએ બે લોકોને મૃત જાહેર કર્યા હતા, જ્યારે બાકીના ત્રણને ગંભીર ઇજાઓ સાથે હોસ્પિટલ ખસેડવામાં આવ્યા હતા. કેટલાક ઘાયલોની સ્થિતિ હજુ પણ ગંભીર હોવાનું જણાવવામાં આવી રહ્યું છે. ઘટનાની ગંભીરતાને ધ્યાનમાં રાખીને ટોરોન્ટો પોલીસે સમગ્ર વિસ્તારને સીલ કરી દીધો છે અને ‘એક્ટિવ શૂટર’ એલર્ટ જાહેર કર્યું છે. સુરક્ષા એજન્સીઓએ લોકોને ઘટનાસ્થળથી દૂર રહેવાની અપીલ કરી છે તેમજ આસપાસના માર્ગો પર અવરજવર પર પણ પ્રતિબંધ મૂકવામાં આવ્યો છે. પોલીસે સમગ્ર વિસ્તારમાં ભારે બંદોબસ્ત ગોઠવીને સર્ચ ઓપરેશન શરૂ કર્યું છે.
પ્રાથમિક તપાસમાં હજુ સુધી હુમલાનું ચોક્કસ કારણ સામે આવ્યું નથી. હુમલાખોર કોણ હતો, તેણે ગોળીબાર શા માટે કર્યો અને શું આ કોઈ નિશાન બનાવીને કરવામાં આવેલો હુમલો હતો કે પછી અંધાધૂંધ ફાયરિંગ હતું, તે અંગે પોલીસે કોઈ સત્તાવાર માહિતી આપી નથી. હુમલા બાદ આરોપી સ્થળ પરથી ફરાર થઈ ગયો હોવાનું માનવામાં આવી રહ્યું છે. પોલીસની અનેક વિશેષ ટીમો હુમલાખોરની શોધખોળમાં લાગી ગઈ છે. ઘટનાસ્થળ તેમજ આસપાસના વિસ્તારોમાં લાગેલા સીસીટીવી કેમેરાના ફૂટેજની તપાસ કરવામાં આવી રહી છે. ઉપરાંત, ફેસ્ટિવલમાં હાજર રહેલા પ્રત્યક્ષદર્શીઓના નિવેદનો પણ નોંધવામાં આવી રહ્યા છે, જેથી હુમલાખોર સુધી ઝડપથી પહોંચી શકાય.
‘સાલ્સા ઓન સેન્ટ ક્લેયર’ ટોરોન્ટોના સૌથી લોકપ્રિય સાંસ્કૃતિક ઉત્સવોમાંનો એક માનવામાં આવે છે. દર વર્ષે હજારો લોકો આ ઉત્સવમાં ભાગ લેવા માટે આવે છે. લેટિન અમેરિકન સંસ્કૃતિ, સંગીત, નૃત્ય અને વિવિધ ફૂડ સ્ટોલ માટે જાણીતા આ ફેસ્ટિવલમાં આ પ્રકારની હિંસક ઘટના બનતાં સ્થાનિકોમાં ભારે ભયનો માહોલ સર્જાયો છે. ગોળીબાર બાદ ફેસ્ટિવલના તમામ કાર્યક્રમો તાત્કાલિક બંધ કરી દેવામાં આવ્યા હતા અને લોકોને સુરક્ષિત સ્થળે ખસેડવામાં આવ્યા હતા. શહેરના વહીવટી તંત્ર અને પોલીસ અધિકારીઓ સતત પરિસ્થિતિ પર નજર રાખી રહ્યા છે. અધિકારીઓએ લોકોને અફવાઓથી દૂર રહેવા અને માત્ર સત્તાવાર માહિતી પર વિશ્વાસ રાખવાની અપીલ કરી છે. કેનેડામાં છેલ્લા કેટલાક સમયથી જાહેર સ્થળોએ ગન વાયોલન્સની ઘટનાઓમાં વધારો જોવા મળી રહ્યો છે. આવી ઘટનાઓને રોકવા માટે સરકાર અને સુરક્ષા એજન્સીઓ સતત પ્રયાસ કરી રહી છે. ટોરોન્ટોમાં થયેલી આ ઘટના બાદ ફરી એકવાર જાહેર સ્થળોની સુરક્ષા અને ગન કંટ્રોલના મુદ્દા પર ચર્ચા તેજ બની છે.
