ગાંધીનગર: આ વખતે રાજ્ય ચૂંટણી પંચ દ્વારા મતદાનની પ્રક્રિયામાં કેટલાક મહત્ત્વપૂર્ણ ફેરફારો કરવામાં આવ્યા છે. ખાસ કરીને મહાનગરપાલિકાના મતદારોએ આ વખતે વોટ આપતી વખતે ખાસ સાવધાની રાખવી પડશે, કારણ કે માત્ર ઉમેદવારના નામ સામેનું બટન દબાવવાથી મતદાન પૂર્ણ થશે નહીં.
‘રજિસ્ટર’ બટન દબાવવું જરૂરી
ચૂંટણી પંચની નવી સૂચના મુજબ, તમે તમારી પસંદગીના ઉમેદવારોના નામ સામેના બટન દબાવ્યા બાદ, જ્યાં સુધી EVMમાં નીચે આવેલું પીળા રંગનું ‘રજિસ્ટર’ બટન નહીં દબાવો ત્યાં સુધી તમારો મત માન્ય ગણાશે નહીં. તમે ચાર મત આપો કે ચારથી ઓછા, પરંતુ મતદાન પ્રક્રિયા પૂર્ણ કરવા માટે આ પીળું બટન દબાવવું ફરજિયાત છે.
મતદાનની પદ્ધતિ: મહત્તમ 4 ઉમેદવારોને આપી શકાશે વોટ
પેનલ સિસ્ટમ: મહાનગરપાલિકાના દરેક વોર્ડમાં ચાર ઉમેદવારોની પેનલ હોય છે.
પસંદગીની છૂટ: મતદાર પોતાની પસંદગી મુજબ આખી પેનલને અથવા અલગ-અલગ પક્ષના ઉમેદવારોને મળીને કુલ 4 મત આપી શકશે.
ઓછા મત: જો કોઈ મતદાર 1, 2 કે 3 ઉમેદવારને જ મત આપવા માંગતા હોય, તો પણ તેઓ આપી શકે છે. બાકીના મતો માટે ‘નોટા’ (NOTA) નો ઉપયોગ પણ કરી શકાશે.
ઝડપી મતદાન માટે ખાસ આયોજન
સમય મર્યાદા: દરેક મતદારને વોટિંગ કરવા માટે આશરે 50થી 60 સેકન્ડનો સમય મળશે.
વધુ EVM: ઉમેદવારોની સંખ્યા વધારે હોવાથી દરેક બૂથ પર 2 થી 3 EVM મશીનો મુકાશે. દરેક મશીનમાં ઉમેદવાર અને નોટા સહિત 15 બટન હશે.
VVPAT નો ઉપયોગ નહીં: નોંધનીય છે કે આ વખતે મતદાન પ્રક્રિયામાં વીવીપેટ (VVPAT) મશીનનો ઉપયોગ કરવામાં આવશે નહીં.
સિમિત મતદારો: મતદાન મથકો પર ભીડ ન થાય તે માટે દરેક મથક પર અંદાજે 800 મતદારોની સંખ્યા નક્કી કરાઈ છે.
ચૂંટણી કાર્ડ ન હોય તો શું કરવું ?
જો તમારી પાસે ચૂંટણી કાર્ડ ન હોય, તો ચિંતા કરવાની જરૂર નથી. સરકાર દ્વારા માન્ય કરવામાં આવેલા 12 અન્ય પુરાવાઓ (જેમ કે પાન કાર્ડ, ડ્રાઈવિંગ લાઈસન્સ વગેરે) માંથી કોઈ પણ એક બતાવીને તમે તમારા મતાધિકારનો ઉપયોગ કરી શકશો.
