નવી દિલ્હી: નેપાળમાં (Nepal) એક ચીનના ફૂડ બ્લોગરની (Chinese Food Blogger) હત્યાનો (Murder) મામલો સામે આવ્યો છે. ચીનનો એક બ્લોગર નેપાળના બજારમાં લાઈવ સ્ટ્રીમિંગ (Live streaming) કરી રહ્યો હતો, આ દરમિયાન તેની હત્યા કરી નાખવામાં આવતા તેના ફોલોઅર્સને આઘાત લાગ્યો હતો.
મળતી માહિતી મુજબ ચાઈનીઝ ફૂડ બ્લોગર નેપાળની શેરીઓમાં લાઈવ સ્ટ્રીમિંગ કરી રહ્યો હતો ત્યારે જાહેરમાં તેના પર હુમલો કરવામાં આવ્યો હતો. આ ઘટનામાં ફૂડ બ્લોગરનો અન્ય એક સાથી ઘાયલ થયો હતો. પ્રારંભિક તપાસમાં જાણવા મળ્યું છે કે ચીની બ્લોગરની હત્યા કરનાર વ્યક્તિ તેની ઈર્ષ્યા કરતો હતો અને તેના વીડિયોને લઈને અગાઉ પણ બંને વચ્ચે મતભેદ હતા. આ સિવાય બંને વચ્ચે પૈસાની લેવડ-દેવડને લઈને પણ ઝઘડો થયો હતો.
ચાઈનીઝ ફૂડ બ્લોગર ગાન સૂજિયોંગ સોશિયલ મીડિયા પર ‘ફેટી ગોઝ ટુ આફ્રિકા’ નામથી લોકપ્રિય છે. તેના 50 લાખ ફોલોઅર્સ છે. નેપાળની રાજધાની કાઠમંડુના ઈન્દ્ર ચોકમાં 4 ડિસેમ્બરે સૂજિયોંગ પર હુમલો કરવામાં આવ્યો હતો.આ કેસમાં પોલીસે 37 વર્ષીય ફેંગ ઝેંગ્યુંગની ધરપકડ કરી છે, જે એક આરોપી ચીની નાગરિક છે.
આ ઘટનામાં સૂજિયોંગના સાથી 32 વર્ષીય લી ચુઝાન પણ ઘાયલ થયા હતા. પોલીસે જણાવ્યું કે અગાઉ બંને પક્ષો વચ્ચે મારામારી થઈ હતી. પ્રારંભિક અહેવાલ મુજબ, આરોપી ફેંગ નેપાળમાં રહે છે, તે સોશિયલ મીડિયા પર અયુન નામથી લોકપ્રિય છે. ફેંગના સૂજિયોંગ અને પૈસાની લેવડ-દેવડના અગાઉના કેટલાક વીડિયોમાં ગરબડ થઈ હતી. ફેંગને પણ સૂજિયોંગની ઈર્ષ્યા થતી હતી.
20 વર્ષીય સૂજિયોંગના ચાહકોને દુનિયાભરની વાનગીઓ વિશે જણાવતો હતો, આ ક્રમમાં તે કાઠમંડુમાં શૂટિંગ કરી રહ્યો હતો. 4 ડિસેમ્બરે જ્યારે આ ઘટના બની ત્યારે કાઠમંડુના બજારમાંથી પસાર થતી વખતે સૂજિયોંગ સતત દુકાનદારો સાથે વાત કરી રહ્યો હતો. અચાનક જોરથી બૂમો સંભળાઈ અને તેનો ફોન અચાનક જમીન પર પડ્યો. અન્ય વીડિયોમાં સૂજિયોંગનો ચહેરો લોહીથી લથપથ જોવા મળે છે.
નેપાળી મીડિયા દ્વારા ટાંકવામાં આવેલા અહેવાલ મુજબ, સૂજિયોંગ પર તેની છાતી અને પેટ પર તીક્ષ્ણ વસ્તુથી હુમલો કરવામાં આવ્યો હતો, ત્યારબાદ તેને નેશનલ ટ્રોમા સેન્ટરમાં દાખલ કરવામાં આવ્યો હતો. તબીબોએ તેનો જીવ બચાવવા ખૂબ પ્રયાસ કર્યા, પરંતુ બીજા દિવસે તેનું મોત થઈ ગયું. આ ઘટનામાં સૂજિયોંગના મિત્ર લી ચુઝાનને પણ તીક્ષ્ણ હથિયાર વડે નિશાન બનાવાયું હતું, તે પણ હુમલામાં ખરાબ રીતે ઘાયલ થયો હતો પરંતુ ડોક્ટરોએ તેનો જીવ બચાવ્યો હતો.
