મધ્યપ્રદેશના ઉજ્જૈનમાં સિંહસ્થ-2028ની તૈયારીઓ વચ્ચે રસ્તા પહોળા કરવાની કામગીરી ઝડપથી આગળ વધી રહી છે. આ કામગીરીની અસર મુખ્યમંત્રી મોહન યાદવના પોતાના પૈતૃક ઘર સુધી પહોંચી છે. રવિવારે મુખ્યમંત્રી મોહન યાદવ ઉજ્જૈન પહોંચ્યા હતા અને તેમણે પોતે જ ગૈતી ચલાવીને પોતાના પૈતૃક મકાનનો એક ભાગ તોડવાની શરૂઆત કરી હતી. પરિવાર દ્વારા રસ્તા પહોળા કરવાની કામગીરી માટે મકાનનો જરૂરી હિસ્સો તોડવા સંમતિ આપવામાં આવી છે અને વળતર નહીં લેવાનો નિર્ણય પણ જણાવાયો છે.
ઉજ્જૈનમાં સિંહસ્થ-2028 દરમિયાન મોટી સંખ્યામાં શ્રદ્ધાળુઓ આવવાના હોવાથી શહેરના રસ્તાઓ, ટ્રાફિક વ્યવસ્થા અને અન્ય માળખાકીય સુવિધાઓને સુધારવામાં આવી રહી છે. આ અંતર્ગત ખજૂરવાળી મસ્જિદથી અબ્દાલપુરા, જીવાજીગંજ પોલીસ સ્ટેશન થઈ ગણેશ ચોક સુધીના આશરે 730 મીટર લાંબા માર્ગને પહોળો કરવામાં આવી રહ્યો છે. હાલનો રસ્તો વધુ પહોળો કરીને આશરે 15 મીટર કરવાનો પ્રોજેક્ટ છે.
આ માર્ગના વિસ્તરણની કામગીરીમાં અંદાજે 272 મકાનો અસરગ્રસ્ત થઈ રહ્યા હોવાનું મીડિયા ના અહેવાલમાં જણાવાયું છે. આ મકાનો પર અગાઉ લાલ નિશાન લગાવવામાં આવ્યા હતા. હવે ઉજ્જૈન નગર નિગમ દ્વારા રસ્તા પહોળા કરવા માટે અસરગ્રસ્ત બાંધકામો દૂર કરવાની કામગીરી શરૂ કરવામાં આવી છે. મુખ્યમંત્રીનું પૈતૃક ઘર પણ આ જ યાદીમાં સામેલ છે. મોહન યાદવના પૈતૃક મકાનનો આશરે 2.30થી 2.90 મીટર જેટલો ભાગ રસ્તા માટે દૂર કરવામાં આવશે.આ ઘર મુખ્યમંત્રી માટે માત્ર એક મકાન નથી, પરંતુ તેમના બાળપણ અને રાજકીય જીવન સાથે જોડાયેલી અનેક યાદીઓ ધરાવે છે. મીડિયા અનુસાર, આ મકાન તેમના દાદા રામચંદ્ર યાદવે 1974માં બનાવ્યું હતું. મોહન યાદવનો જન્મ પણ આ જ ઘરમાં થયો હતો અને તેમનું બાળપણ અહીં જ પસાર થયું હતું.
રાજકારણમાં પ્રવેશ પહેલાંના તેમના જીવનની કેટલીક મહત્વપૂર્ણ ઘટનાઓ પણ આ ઘર સાથે જોડાયેલી છે. મોહન યાદવ વિદ્યાર્થી રાજકારણ સાથે જોડાયા હતા અને આ મકાનમાં રહેતા સમયે તેઓ પ્રથમ વખત કોલેજના અધ્યક્ષ તરીકે ચૂંટાયા હતા. લાંબી રાજકીય સફર બાદ તેઓ મધ્યપ્રદેશના મુખ્યમંત્રી બન્યા છે. હાલમાં આ મકાનમાં તેમના કાકાનું પરિવાર રહે છે.મકાન તોડવાની શરૂઆત કરતી વખતે મુખ્યમંત્રી ભાવુક પણ થયા હતા. તેમ છતાં પરિવાર તરફથી રસ્તા પહોળા કરવાની કામગીરીમાં સહયોગ આપવાનો નિર્ણય કરવામાં આવ્યો છે. તેમની બહેન અને ભાજપ નેતા કલાવતી યાદવનું મકાન પણ આ રસ્તા પહોળા કરવાની કામગીરીની ઝપેટમાં આવ્યું છે. તેમના મકાનનો પણ એક હિસ્સો દૂર કરવામાં આવનાર છે. અગાઉ કલાવતી યાદવે શહેરના વિકાસ અને સિંહસ્થ મહાપર્વની તૈયારીઓને ધ્યાનમાં રાખીને પરિવાર તરફથી પ્રશાસનને સંપૂર્ણ સહયોગ આપવાની વાત કરી હતી.
આ સમગ્ર માર્ગ પહોળો કરવાની યોજનાનો હેતુ સિંહસ્થ-2028 દરમિયાન ઉજ્જૈનમાં વધનારા ટ્રાફિક અને શ્રદ્ધાળુઓની અવરજવરને ધ્યાનમાં રાખીને માર્ગ વ્યવસ્થા સુધારવાનો છે. અગાઉ પણ શહેરના વિવિધ વિસ્તારોમાં રસ્તા પહોળા કરવા માટે બાંધકામો દૂર કરવામાં આવ્યા છે. મહાકાલ મંદિર તરફ જતા માર્ગો સહિત અનેક વિસ્તારોમાં માળખાકીય વિકાસની કામગીરી ચાલી રહી છે.જોકે, આ કામગીરી સાથે અસરગ્રસ્ત પરિવારોના વળતર અને પુનર્વસનનો મુદ્દો પણ મહત્વનો બની રહ્યો છે. અગાઉના અહેવાલમાં જણાવાયું હતું કે આ માર્ગ પર ગરીબ અને મધ્યમવર્ગીય પરિવારોના મકાનો પણ અસરગ્રસ્ત થઈ રહ્યા છે અને કેટલાક સ્થાનિકો દ્વારા યોગ્ય વળતર તથા પુનર્વસનની માંગ કરવામાં આવી રહી છે. તેથી સિંહસ્થની તૈયારીઓ સાથે વિકાસકાર્ય અને અસરગ્રસ્ત લોકોના હિત વચ્ચે સંતુલન જાળવવાનો મુદ્દો પણ ચર્ચામાં છે.
સિંહસ્થ-2028ને ધ્યાનમાં રાખીને ઉજ્જૈન શહેરમાં હાલ રસ્તા પહોળા કરવા, ટ્રાફિક વ્યવસ્થા સુધારવા અને અન્ય માળખાકીય સુવિધાઓ વિકસાવવાની કામગીરી ચાલી રહી છે. આ પ્રક્રિયામાં મુખ્યમંત્રીના પોતાના પૈતૃક મકાનનો હિસ્સો પણ દૂર થઈ રહ્યો છે. મુખ્યમંત્રી દ્વારા પોતે ગૈતી ચલાવીને મકાન તોડવાની શરૂઆત કરવી આ સમગ્ર કાર્યવાહીનું નોંધપાત્ર દૃશ્ય બન્યું છે.
