પ્રધાનમંત્રી નરેન્દ્ર મોદી તેમના વિદેશ પ્રવાસના ચોથા તબક્કામાં બ્રાઝિલ પહોંચ્યા છે. બ્રાઝિલની રાજધાની રિયો ડી જાનેરોમાં પીએમ મોદીનું ભવ્ય સ્વાગત કરવામાં આવ્યું છે. પીએમ મોદી બ્રાઝિલમાં ચાર દિવસ વિતાવશે. આ દરમિયાન તેઓ 17મા બ્રિક્સ સમિટમાં પણ ભાગ લેશે.
બ્રાઝિલમાં NRIs એ પરંપરાગત નૃત્ય અને લોકગીતો સાથે PM મોદીનું ભવ્ય સ્વાગત કર્યું. ખાસ વાત એ છે કે આ નૃત્ય પ્રદર્શનની થીમ ‘ઓપરેશન સિંદૂર’ પર આધારિત હતી, જેમાં લોકો “યે દેશ નહીં મિટને દૂંગા” ગીત પર નાચતા જોવા મળ્યા હતા.
બ્રિક્સ સમિટમાં ભાગ લેશે,પીએમ મોદી:
તમને જણાવી દઈએ કે આજે અને કાલે એટલે કે તા6-7 જુલાઈ 2025ના રોજ બ્રાઝિલમાં 17મું બ્રિક્સ સમિટ યોજાશે. આ સમિટમાં બ્રાઝિલ, રશિયા, ભારત, ચીન અને દક્ષિણ આફ્રિકાના નેતાઓ ભાગ લેશે. પીએમ મોદી આ દેશો સાથે દ્વિપક્ષીય વાતચીત પણ કરી શકે છે.
પીએમ મોદી આ મુદ્દાઓ પર ચર્ચા કરશે:
બ્રિક્સ બેઠકમાં પીએમ મોદી ઘણા મોટા મુદ્દાઓ ઉઠાવી શકે છે. ઉદાહરણ તરીકે, શાંતિ, સુરક્ષા, આર્ટિફિશિયલ ઇન્ટેલિજન્સ, આબોહવા પરિવર્તન, આરોગ્ય અને નાણાં સંબંધિત બાબતો પર પીએમ મોદીની ચર્ચા થઈ શકે છે.
9 જુલાઈએ નામિબિયા જશે:
બ્રાઝિલ પ્રવાસ પૂર્ણ કર્યા પછી, પીએમ મોદી તા.9 જુલાઈએ આફ્રિકન દેશ નામિબિયાની મુલાકાત લેશે. આ સમય દરમિયાન, પીએમ મોદી નામિબિયાની સંસદને સંબોધિત કરશે. પ્રધાનમંત્રી નરેન્દ્ર મોદી 8 દિવસમાં 5 દેશોના પ્રવાસે છે. આ પહેલા પીએમ મોદી ઘાના, ત્રિનિદાદ અને ટોબેગો અને આર્જેન્ટિનાની મુલાકાત લઈ ચૂક્યા છે.
