એશિયન ગેમ્સ 2026ની પુરુષ ક્રિકેટ સેમિફાઇનલમાં ભારતે શ્રીલંકા સામે 170 રનનો ટાર્ગેટ આપ્યો છે. ભારતે પ્રથમ બેટિંગ કરીને 20 ઓવરમાં 7 વિકેટે 169 રન બનાવ્યા હતા. જવાબમાં શ્રીલંકાની શરૂઆત ખૂબ જ ખરાબ રહી છે અને ટીમે માત્ર 11 રનના સ્કોર સુધીમાં ત્રણ વિકેટ ગુમાવી દીધી છે. શ્રીલંકાના ટોપ-3 બેટર્સમાંથી ત્રણેય સસ્તામાં પેવેલિયન પરત ફર્યા છે. જસપ્રીત બુમરાહે પહેલા સિનેથ જયવર્ધનેને આઉટ કર્યો અને ત્યારબાદ સોહન ડી લિવેરાને પણ પેવેલિયન મોકલ્યો. રવિ બિશ્નોઈએ લસિથ ક્રૂસ્પુલેને ડાયરેક્ટ હિટ દ્વારા રનઆઉટ કરીને ભારતને ત્રીજી સફળતા અપાવી હતી. આ કારણે શ્રીલંકા શરૂઆતમાં જ મુશ્કેલીમાં મુકાઈ ગયું છે.
આ પહેલા ટોસ જીતીને શ્રીલંકાએ ભારતને પ્રથમ બેટિંગ માટે આમંત્રણ આપ્યું હતું. ભારતીય ટીમની શરૂઆત પણ સારી રહી નહોતી. 12 રનના સ્કોર પર અભિષેક શર્મા 7 રન બનાવીને આઉટ થયો હતો. ત્યારબાદ ત્રીજી ઓવરના અંતિમ બોલે સંજુ સેમસન પણ 9 બોલમાં 7 રન બનાવીને પેવેલિયન પરત ફર્યો હતો. થારિંદુ રત્નાયકેએ સેમસનને ક્લીન બોલ્ડ કર્યો હતો. આ પછી વૈભવ સૂર્યવંશીએ ઝડપી બેટિંગ કરીને ભારતીય ઇનિંગ્સને વેગ આપ્યો હતો. વૈભવે માત્ર 21 બોલમાં 38 રન બનાવ્યા હતા. તેની ઇનિંગ્સમાં 6 ચોગ્ગા અને 2 છગ્ગા સામેલ હતા. તેણે પાવરપ્લે દરમિયાન શ્રીલંકાના બોલરો સામે આક્રમક બેટિંગ કરી હતી. જોકે સાતમી ઓવરમાં તે 38 રન બનાવીને આઉટ થયો હતો.
વૈભવના આઉટ થયા બાદ કેપ્ટન શ્રેયસ અય્યરે ઇનિંગ્સને આગળ વધારવાનો પ્રયાસ કર્યો હતો. જોકે તે પણ મોટી ઇનિંગ્સ રમી શક્યો નહોતો. શ્રેયસ 13 બોલમાં 13 રન બનાવીને આઉટ થયો હતો. વાનુજા સચિનના બોલે તેને બોલ્ડ કર્યો હતો. ત્યારબાદ તિલક વર્મા પણ માત્ર 2 રન બનાવીને સ્ટમ્પિંગ થયો હતો. 15મી ઓવરમાં અક્ષર પટેલ 13 બોલમાં 8 રન બનાવીને આઉટ થયો હતો. આ સમયે ભારતની ઇનિંગ્સ ફરી એકવાર મુશ્કેલીમાં આવી ગઈ હતી. શિવમ દુબે પાસેથી પણ મોટી ઇનિંગ્સની આશા હતી, પરંતુ તે 9 બોલમાં માત્ર 3 રન બનાવીને આઉટ થયો હતો. થારિંદુ રત્નાયકેના બોલ પર તેણે કવર તરફ શોટ રમવાનો પ્રયાસ કર્યો હતો, પરંતુ સચિન અરાચિગેએ શાનદાર કેચ પકડીને તેની ઇનિંગ્સનો અંત લાવ્યો હતો.
એક તરફ ભારતની વિકેટો સતત પડી રહી હતી, ત્યારે ઈશાન કિશને એક છેડો સંભાળી રાખ્યો હતો. તેણે શાનદાર બેટિંગ કરતાં 46 બોલમાં અણનમ 80 રન બનાવ્યા હતા. તેની ઇનિંગ્સમાં ચોગ્ગા અને છગ્ગાનો સમાવેશ થયો હતો. ઈશાનની આ ઇનિંગ્સના કારણે ભારત 20 ઓવરમાં 169 રન સુધી પહોંચી શક્યું હતું. શ્રીલંકા તરફથી થારિંદુ રત્નાયકે અને સહાન અરાચિગેએ બે-બે વિકેટ ઝડપી હતી. જ્યારે અન્ય બોલરોને પણ એક-એક સફળતા મળી હતી. ભારતે અંતે 7 વિકેટ ગુમાવીને 169 રન બનાવ્યા અને શ્રીલંકા સામે 170 રનનો લક્ષ્યાંક મૂક્યો હતો.
ભારત માટે ઈશાન કિશનની અણનમ 80 રનની ઇનિંગ્સ સૌથી મહત્વપૂર્ણ રહી હતી. વૈભવ સૂર્યવંશીએ પણ શરૂઆતમાં ઝડપી 38 રન બનાવીને ટીમને જરૂરી ગતિ આપી હતી. બંનેની ઇનિંગ્સના કારણે શરૂઆતમાં વિકેટ ગુમાવ્યા છતાં ભારત સન્માનજનક સ્કોર સુધી પહોંચી શક્યું હતું. આ સેમિફાઇનલમાં ભારતની નજર ફાઇનલમાં સ્થાન મેળવવા પર છે. ભારત 2023ની એશિયન ગેમ્સમાં ગોલ્ડ મેડલ જીત્યું હતું અને આ વખતે પણ ટીમ ખિતાબ જાળવી રાખવા માટે મેદાનમાં ઉતરી છે. ભારત અને શ્રીલંકા વચ્ચેની આ મેચ જાપાનના નિશિન શહેરના કોરોગી સ્પોર્ટ્સ પાર્કમાં રમાઈ રહી છે.
ભારતના ક્વાર્ટર ફાઇનલ મુકાબલામાં વરસાદને કારણે એક પણ બોલ રમાઈ શક્યો નહોતો અને મેચ રદ થઈ હતી. ટૂર્નામેન્ટના નિયમો મુજબ ભારતને ઉચ્ચ રેન્કિંગના કારણે સેમિફાઇનલમાં સ્થાન મળ્યું હતું. શ્રીલંકાની ક્વાર્ટર ફાઇનલ મેચ પણ વરસાદને કારણે રદ થતાં તે પણ સેમિફાઇનલમાં પહોંચ્યું હતું. ભારત અને શ્રીલંકા વચ્ચે T20 ક્રિકેટમાં અત્યાર સુધીમાં 33 મુકાબલા થયા છે. તેમાં ભારતે 23 મેચ જીતી છે, જ્યારે શ્રીલંકાને 9 મેચમાં જીત મળી છે અને એક મેચનું પરિણામ આવ્યું નહોતું. બંને ટીમો વચ્ચેનો આ મુકાબલો ફાઇનલમાં પહોંચવા માટે મહત્વપૂર્ણ છે.
