વડોદરા તારીખ 20
અલકાપુરી વિસ્તારમાં આવેલી ગોવર્ધનનાથજીની હવેલીમાં સફાઈ કામ કરતો કર્મચારી સ્ટીક પર પટ્ટી લગાડીને અલગ અલગ દાન પેટીમાંથી રૂપિયા ચોરી કરતા સીસીટીવી કેમેરામાં કેદ થઈ ગયો હતો. દાન પેટીઓ ભરાઈ ગઈ હોય મેનેજર સહિતના લોકો ખાલી કરી રહ્યા હતા ત્યારે તેમાંથી પટ્ટી લગાવેલી સ્ટીક મળતા તેમને શંકા ગઈ હતી. જેથી લગાવેલા સીસીટીવી ચેક કરતા સફાઈ કર્મચારીના કાંડનો પર્દાફાશ થયો હતો. સ્ટોર ઇન્ચાર્જએ અકોટા પોલીસ સ્ટેશનમાં સફાઈ કર્મી વિરુદ્ધ ચોરીની ફરિયાદ નોંધાવી છે.
વડોદરા શહેરના અલકાપુરી વિસ્તારમાં આવેલા ગોકુળ એપાર્ટમેન્ટમાં રહેતા મહેશ ભગવાનદાસ શાહ ઊર્મિ સોસાયટીમાં શ્રી ગોવર્ધન સેવા ટ્રસ્ટમાં છેલ્લા 30 વર્ષથી સ્ટોર ઇન્ચાર્જ તરીકે નોકરી કરે છે. આ ગોવર્ધન નાથજીની હવેલીમાં છેલ્લા 12 વર્ષથી સંજયભાઈ દિનેશભાઈ બારીયા (રહે.શ્રીનાથધામ ડુપ્લેક્ષ, દિનેશ મીલ રોડ અકોટા વડોદરા) ને સાફ-સફાઈ માટે નોકરી પર રાખવામાં આવ્યો હતો. ગત 18 જૂનના રોજ બપોરના એક વાગ્યાની આસપાસ ગોવર્ધન સેવા ટ્રસ્ટના મેનેજર ગોપાલભાઈ શાહ, ગૌરાંગભાઈ માળી, પંકજભાઈ શાહ તથા અન્ય લોકોની હાજરીમાં ગોવર્ધન નાથ હવેલીમાં મૂકવામાં આવેલી દાનપેટી ભરાઈ જવાના કારણે તેને ખાલી કરતા હતા. તે દરમિયાન દાન પેટીમાંથી બે પટ્ટી લગાવેલી વાંસની સ્ટીક મળી આવી હતી. જેથી મેનેજર સહિતના લોકોને દાન પેટીમાંથી કોઈ ચોરી કરતું હોવાની શંકા જતા ગોવર્ધન નાથ હવેલીમાં લગાવેલા સીસીટીવી કેમેરા ચેક કરતા સફાઇ કામ કરતા સંજય દિનેશ બારીયા હાથમાં વાંસની સ્ટીક લઈને હવેલીમાં અલગ અલગ જગ્યાએ મુકેલી દાનપેટીઓમાં વાંસની સેલોટેપ વાળી સ્ટીક નાખી રૂપિયા કાઢતો જણાયો હતો. જેથી અગાઉના દિવસોના કેમેરાનું ફુટેજ ચેક કરતા છેલ્લા સતત ત્રણ દિવસથી સવારના સમયે ગોવર્ધન નાથજીની હવેલીમાં મુકેલી દાન પેટીઓમાં વાંસની સ્ટીક નાખી રૂપિયા કાઢતો સંજય બારીયા કેમેરામાં કેદ થઈ ગયો હતો. તેને અત્યાર સુધીમાં દાન પેટીઓમાંથી રૂપિયા 25 હજારની ચોરી કરી હોય અકોટા પોલીસ સ્ટેશનમાં સંજય બારીયા વિરુદ્ધ સ્ટોર ઇન્ચાર્જ મહેશભાઈ શાહ દ્વારા ફરિયાદ નોંધાવવામાં આવી છે.
