વડોદરા મહાનગરપાલિકાની એફોર્ડેબલ હાઉસિંગ શાખા દ્વારા પ્રધાનમંત્રી આવાસ યોજના (શહેરી) હેઠળ ભાયલી અને સેવાસી ખાતે નિર્માણાધીન ઇ.ડબલ્યુ.એસ-2 કેટેગરીના આવાસો માટે અરજી પ્રક્રિયાની મુદતમાં વધારો કરવામાં આવ્યો છે. આ યોજનાનો લાભ લેવા ઇચ્છુકોને હવે વધુ સમય મળશે, કારણ કે ઓનલાઈન ફોર્મ ભરવાની તારીખ 15 દિવસ લંબાવી દેવામાં આવી છે. મહત્વપૂર્ણ રીતે, ભાયલી ફાઇનલ પ્લોટ નં.93, ભાયલી ફાઇનલ પ્લોટ નં.116 અને સેવાસી ફાઇનલ પ્લોટ નં.71 ખાતેના આવાસો માટે આ સમયમર્યાદા લંબાવવામાં આવી છે. અગાઉ જાહેર કરાયેલ સમયમર્યાદા પૂર્ણ થતી હોવાના કારણે અનેક લાભાર્થીઓએ અરજી કરવા માટે વધારાની માંગ ઉઠાવી હતી, જેને ધ્યાનમાં લઈ પાલિકા તંત્ર દ્વારા નવા નિર્ણય તરીકે 19 જૂનથી 4 જુલાઈ 2025 સુધી ઓનલાઈન અરજીઓ ભરવાની મુદત નક્કી કરવામાં આવી છે. આવાસ માટે ઓનલાઈન અરજી કરવાની પ્રક્રિયા www.vmc.gov.in વેબસાઈટ પર ઉપલબ્ધ છે.
